Policia e Kosovës ka arrestuar të martën Arianit Sllamnikun, nën dyshimet për ushtrim të kundërligjshëm të veprimtarisë mjekësore ose farmaceutike, si dhe për eksperimente të kundërligjshme mjekësore dhe testim të barnave.
Sipas mediave në Kosovë, Sllamniku dyshohet se u ka shitur disa personave ilaçe për kafshë, duke pretenduar se përmes tyre fëmijët mund të shëroheshin nga autizmi.
Me urdhër të Prokurorisë Themelore të Gjilanit, i dyshuari është ndaluar për 48 orë, ndërsa hetimet për rastin vijojnë.
Ndërkohë, Policia e Kosovës në Gjilan u ka bërë thirrje qytetarëve që kanë marrë shërbime shëndetësore apo konsultime nga Arianit Sllamniku, dhe që mendojnë se mund të jenë dëmtuar qoftë materialisht apo shëndetësisht, të paraqiten në ambientet e Njësisë së Hetimeve Rajonale në Gjilan për intervistim.
Lidhur me rastin ka reaguar edhe Ministria e Shëndetësisë, e cila u ka bërë thirrje qytetarëve të mos bien pre e mashtrimeve dhe të besojnë vetëm metodat e trajtimit të verifikuara shkencërisht.
“Ministria e Shëndetësisë ka ndjekur me shqetësim raportimet në media dhe rrjete sociale lidhur me pretendimet se një individ dyshohet se ka ofruar ilaçe, duke i paraqitur ato si trajtim për autizëm. U bëjmë thirrje qytetarëve që t’u besojnë vetëm metodave të verifikuara shkencërisht, të cilat ofrohen nga institucione dhe profesionistë të licencuar shëndetësorë”, thuhet në reagimin zyrtar të MSH-së.
Autoritetet theksojnë se hetimet do të vijojnë për të zbardhur plotësisht rrethanat e kësaj veprimtarie të dyshuar të paligjshme. /skyweb.al
