Në një nga vendndodhjet më të lakmuara të Venecias, buzë Kanalit të Madh, pallati historik Ca’ Dario qëndron mbi ujë që nga fundi i shekullit të 15-të. Vetëm pak hapa larg Koleksionit Peggy Guggenheim, ndërtesa konsiderohet një xhevahir arkitektonik, por prej vitesh mbetet pa pronar.
Arsyeja nuk lidhet me çmimin, i cili sipas tregut arrin në mbi 17 milionë euro, por me reputacionin e frikshëm që e ka shoqëruar ndër shekuj. Ca’ Dario njihet gjerësisht si “pallati i mallkuar i Venecias”, për shkak të një serie vrasjesh, vetëvrasjesh dhe aksidentesh misterioze që lidhen me pronarë dhe vizitorë të tij.
Pallati mban emrin e pronarit të parë, Giovanni Dario, një diplomat venecian i shpallur hero pas nënshkrimit të një traktati paqeje me Perandorinë Osmane. Gjatë shekujve, ndërtesa ka pritur fisnikë, tregtarë dhe figura të njohura të jetës kulturore europiane.
Në vitin 1908, Ca’ Dario u pikturua nga Claude Monet gjatë udhëtimit të tij në Venecia, ndërsa një vit më vonë u përmend edhe nga shkrimtari Henry James në ditarin e tij të udhëtimit “Orët italiane”.
Ndërtesa përmban nëntë dhoma gjumi, tetë banjo dhe sallone madhështore pritjeje të dekoruara me afreske, por pavarësisht bukurisë, ka rezultuar pothuajse e pamundur për t’u shitur.
Sipas historive që qarkullojnë prej dekadash, pallati lidhet me të paktën shtatë vdekje. Rasti më tronditës daton në vitin 1970, kur pronari i asaj kohe, Konti Filippo Giordano Delle Lanze, u vra brenda pallatit nga partneri i tij, një marinar që më pas u arratis në Londër dhe u vra edhe vetë.
Një vit më pas, prona u ble nga Kit Lambert, menaxher i grupit legjendar The Who. Edhe pse ai shprehej se nuk besonte te mallkimi, miqve u kishte rrëfyer se nuk flinte në pallat. Më vonë ai ra në varësi nga droga, përjetoi probleme financiare dhe vdiq në Londër në vitin 1981 pas një rënieje nga shkallët, ngjarje që vendasit ia atribuuan sërish mallkimit.
Në vitet 1980, pallati kaloi në pronësi të biznesmenit italian Raoul Gardini, i cili u përfshi në një skandal të madh korrupsioni dhe kreu vetëvrasje në Milano në vitin 1993.
Legjendat shkojnë edhe më tej, duke thënë se Ca’ Dario sjell fat të keq edhe për ata që thjesht e vizitojnë. Tenori i famshëm Mario Del Monaco kishte planifikuar ta blinte në vitin 1964, por hoqi dorë pas një aksidenti të rëndë automobilistik gjatë rrugës për ta parë pronën. Ndërsa John Entwistle, basisti i grupit The Who, vdiq në SHBA vetëm një javë pasi kishte marrë pallatin me qira.
Pas këtyre ngjarjeve, ndërtesa mbeti kryesisht e braktisur. Edhe pse ka pasur interes nga figura të njohura të artit dhe kinemasë, përfshirë emra që janë përfolur jozyrtarisht, askush nuk ka guxuar ta bëjë pronë të vetën.
Në vitin 2006, Ca’ Dario u ble nga një kompani amerikane në emër të një pronari, identiteti i të cilit nuk është bërë publik. Që prej asaj kohe, pallati ka mbetur bosh, duke ushqyer edhe më shumë legjendat urbane.
Drejtori i përgjithshëm i Christie’s në Venecia, Arnaldo Fussello, thotë se venecianët kanë prirjen të tregojnë histori për turistët dhe se shumë prej tyre janë të ekzagjeruara. Ai thekson se qindra persona kanë jetuar në pallat ndër shekuj pa asnjë incident, përfshirë vetë Giovanni Dario-n, i cili vdiq në moshën 80 vjeç nga shkaqe natyrore.
Edhe historiani Davide Bussato shprehet se thashethemet nisën seriozisht vetëm në vitet 1970 dhe u përforcuan pas vetëvrasjes së Gardini-t. Sipas tij, Venecia është plot me ndërtesa historike ku kanë ndodhur tragjedi, por që sot funksionojnë si hotele luksoze.
Pavarësisht reputacionit të errët, agjentët e pasurive të paluajtshme mbeten optimistë se pallati do të shitet. Sipas tyre, interesi ekziston, si nga blerës italianë ashtu edhe nga të huaj.
“Ky është një vend ku jeton historia. Dhe për ata që duan të jetojnë brenda saj, Ca’ Dario mbetet një nga pronat më të veçanta në Venecia”, theksojnë përfaqësuesit e shitjes.
