Prej më shumë se dy javësh, qindra biznese në të gjithë vendin po përballen me probleme serioze në mbarëvajtjen e aktivitetit të tyre për shkak të mosfunksionimit të sistemit SelfCare, i menaxhuar përmes portalit e Albania. Ekonomistët dhe përfaqësuesit e subjekteve raportojnë vështirësi të vazhdueshme në hyrjen në sistem, i cili bie shpesh dhe mbetet i paaksesueshëm për orë të tëra.
Situata ka shkaktuar bllokime të drejtpërdrejta në procesin e fiskalizimit, duke penguar lëshimin e faturave dhe kryerjen e veprimeve bazë të përditshme. Në veçanti, të vetëpunësuarit janë më të prekurit, pasi ata përdorin SelfCare si të vetmen mundësi falas për fiskalizim, ndryshe nga bizneset e tjera që janë të detyruara të paguajnë kompani private për programe fiskale.
Si pasojë e mosfaturimit, shumë subjekte nuk po arrijnë të arkëtojnë të ardhurat mujore, ndërsa në disa raste janë bllokuar edhe pagesat ndaj klientëve. Probleme të tjera lidhen me mosregjistrimin e certifikatave të reja të fiskalizimit, pamundësinë për fiskalizimin e faturave të importit, si dhe mungesën e rakordimit mes faturave të kontrollit dhe atyre të reflektuara në sistem.
Në këtë situatë, Aleanca e Profesionistëve të Lirë i është drejtuar zyrtarisht Drejtorisë së Përgjithshme të Tatimeve dhe Agjencisë Kombëtare të Shoqërisë së Informacionit, duke kërkuar zgjidhje të menjëhershme, udhëzim praktik dhe garanci që bizneset të mos penalizohen për shkelje që nuk burojnë nga përgjegjësia e tyre.
Sipas APL, bllokimet po sjellin pasoja të drejtpërdrejta në ndërprerje të punës, vonesa në faturim dhe arkëtime, rritje të kostove operative, humbje klientësh dhe ekspozim ndaj gjobave dhe penaliteteve për afate që subjektet nuk i kontrollojnë. Organizata paralajmëron se kjo situatë po ndikon negativisht edhe në arkëtimet tatimore të shtetit.
Pavarësisht shkresave zyrtare, profesionistët shprehen se deri më tani nuk ka pasur asnjë reagim nga Ministria e Financave apo nga AKSHI, duke e lënë biznesin në pasiguri totale.
Burime jozyrtare bëjnë me dije se paralizimi i shërbimeve të e qeverisjes lidhet me një kombinim faktorësh, që nga zvarritja e tenderëve të fiskalizimit, përdorimi i zgjidhjeve teknike pa kontroll të plotë profesional, deri te largimet masive të specialistëve pas nisjes së hetimeve të SPAK.
Pak muaj më parë, SPAK zbuloi një skemë të gjerë korrupsioni që lidhej me tenderët e AKSHI, një pjesë e të cilëve kishin si objekt ngritjen dhe mirëmbajtjen e sistemeve të e Albania dhe SelfCare. Skandali po tregon se korrupsioni nuk prodhon pasoja vetëm në fazën e tenderimit, por reflektohet drejtpërdrejt në cilësinë e shërbimit dhe në bllokimin e jetës ekonomike.
Ndërkohë, bizneset mbeten në pritje të një zgjidhjeje konkrete, ose të paktën të një sqarimi zyrtar se kur sistemi do të rikthehet plotësisht funksional, në një kohë kur e Albania, në vend që të lehtësojë aktivitetin ekonomik, po e paralizon atë. /skyweb.al
