Juria ndërkombëtare ka shpallur fitues projektin e studios së njohur daneze Bjarke Ingels Group (BIG) për rikualifikimin urban të Parkut “Rinia”, projekt i njohur edhe si “Tirana Fountain Plaza”.
Pesë studio të njohura ndërkombëtare të arkitekturës garuan për realizimin e projektit. Në konkurs morën pjesë dy kompani daneze, dy franceze dhe një spanjolle, të cilat prezantuan konceptet e tyre për transformimin e kësaj hapësire në qendër të Tiranës.
Në prezantimin e projekteve mori pjesë edhe kryeministri Edi Rama, i cili tha se synimi është që zhvillimi i kësaj zone t’u përgjigjet nevojave dhe ambicieve të Tiranës së sotme.
“Jemi këtu për një zhvillim tjetër të asaj godine që ka nevojë të transformohet për të plotësuar nevojat e një qyteti që nuk është më ai që ishte në vitet ’50, kur u krijua Parku Rinia, as në fund të viteve ’70, kur u ndërtua Tajvani, dhe as në fillim të viteve 2000, kur Tajvani mori një tjetër volum”, u shpreh Rama.
Sipas kryeministrit, bëhet fjalë për një projekt të sipërmarrjes private, në një pronë private, por pozicioni i saj në zemër të Parkut “Rinia” bën që ndërhyrja të ketë ndikim edhe në hapësirat përreth.
Rama hodhi poshtë shqetësimet se projekti mund të dëmtojë parkun apo të reduktojë hapësirat e gjelbra në kryeqytet. Ai theksoi se ndërhyrja duhet të kontribuojë në rigjenerimin e parkut dhe në shtimin e elementeve të gjelbra.
“Është shumë e qartë edhe në perimetrin e përcaktuar nga konkursi që çdo gjë duhet të ndikojë në rigjenerimin e vetë parkut, pa prekur asgjë që natyra ka si prani, por duke shtuar”, deklaroi Rama.
Projekti i Bjarke Ingels Group pritet të përcaktojë një transformim të rëndësishëm të kësaj zone, duke ndërthurur zhvillimin e pronës private me rikualifikimin e hapësirës publike dhe të gjelbër përreth.
