Prodhuesit europianë të automjeteve kanë siguruar më në fund akses në tregun indian përmes marrëveshjes së tregtisë së lirë të nënshkruar këtë të martë mes Bashkimit Europian dhe Indisë.
Megjithatë, marrëveshja vjen me kufizime të shumta, të cilat pritet të vazhdojnë të frenojnë eksportet europiane drejt një prej tregjeve më të mëdha dhe me rritjen më të shpejtë në botë.
Deri më tani, makinat europiane përballeshin me një tarifë ndëshkuese prej 110 për qind në Indi, çka i bënte ato të papërballueshme për shumicën e konsumatorëve.
Me marrëveshjen e re, prodhuesit europianë do të mund të eksportojnë deri në 100 mijë automjete me motorë me djegie, duke paguar një tarifë prej 40 për qind.
Përfitimi më i madh parashikohet në fazën e dytë të marrëveshjes, kur Bashkimi Europian do të ketë të drejtë të eksportojë 250 mijë automjete në Indi me vetëm 10 për qind tarifë doganore.
Por ky mekanizëm nuk pritet të hyjë në fuqi përpara se marrëveshja të zbatohet plotësisht, një proces që mund të zgjasë një dekadë ose më shumë.
Kjo situatë mbetet larg pritshmërive të industrisë automobilistike europiane, e cila synon të zërë një pjesë të konsiderueshme të tregut indian në zgjerim.
“Sigurisht që mund të ishte më mirë,” deklaroi Jonathan O’Riordan, drejtor për tregtinë ndërkombëtare në shoqatën europiane të prodhuesve të automjeteve ACEA.
“Këto kufizime nuk janë ideale, por gjithsesi do ta mbështesim marrëveshjen sepse krijon potencial për rritje të pranisë sonë në Indi.”
Edhe Komisioni Europian ka pranuar se marrëveshja nuk i përmbush objektivat fillestare të Bashkimit. Një zyrtar europian tha se BE është detyruar të pranojë rezultate më modeste nga sa kishte synuar, veçanërisht në sektorin e automjeteve.
Marrëveshja është kulmi i gati 20 viteve negociata, të përshpejtuara nga tensionet tregtare globale dhe konkurrenca në rritje nga mallrat kineze, që kanë shtyrë të dyja palët drejt kompromisit.
Megjithatë, vizionet e Indisë dhe të Bashkimit Europian mbeten të ndryshme. Prodhuesit europianë kërkojnë tregje të reja për të kompensuar uljen e kapaciteteve dhe shkurtimet e vendeve të punës në Europë, duke shpresuar në një skenar të ngjashëm me Kinën e dekadave më parë, e cila u solli fitime të mëdha.
Por marrëveshja aktuale pritet të ketë ndikim të kufizuar. Sipas analistit të industrisë automobilistike Pedro Pacheco, tarifa prej 40 për qind, edhe pse më e ulët se më parë, mbetet shumë e lartë për konsumatorin mesatar indian, i cili ka fuqi blerëse dukshëm më të ulët.
Në të njëjtën kohë, marrëveshja i jep Indisë të drejtën të eksportojë deri në 625 mijë automjete drejt Bashkimit Europian. Argumenti zyrtar është se tregu europian është më i madh, me mbi 10 milionë makina të shitura vitin e kaluar, krahasuar me rreth 4 milionë në Indi.
Por ndërsa shitjet në Europë po stagnojnë, tregu indian pritet të vijojë rritjen në vitet në vijim. Kjo krijon shqetësim për prodhuesit europianë, sidomos në një kohë kur kompanitë po kërkojnë të reduktojnë varësinë nga Kina dhe të diversifikojnë zinxhirët e furnizimit.
Sipas ekspertëve, kushtet që e bëjnë Kinën tërheqëse për prodhim me kosto të ulët dhe infrastrukturë efikase po shfaqen gradualisht edhe në Indi, nëse prodhuesit e huaj transferojnë teknologji dhe kapacitete atje.
Kjo do të ishte pozitive për Indinë dhe për kompanitë që prodhojnë më lirë, por jo domosdoshmërisht për fabrikat europiane, të cilat mund të përballen në të ardhmen me një tjetër fuqi aziatike që depërton në tregun e tyre vendas.
Ekspertët vlerësojnë se India nuk do të shndërrohet në një superfuqi eksporti gjatë kësaj dekade, por një skenar i tillë mund të bëhet realitet pikërisht në kohën kur marrëveshja tregtare të zbatohet plotësisht dhe tarifat të bien në 10 për qind për të dyja palët. /Politico.eu. Përshtati në shqip: Skyweb.al
