Nga Skyweb.al
Pas më shumë se 130 ditësh me lule, parfum, vizatime nga fëmijët dhe ngjyrat e flamingove, prej gjashtë ditësh protestat kanë marrë një tjetër pamje.
Një pjesë e protestuesve kanë zgjedhur ta shprehin revoltën me gurë dhe shkatërrimin e bizneseve private, kryesisht bankave, institucioneve të mikrokredisë dhe dyqaneve të kompanive të telekomunikacionit. Nga ana tjetër, policia ka përdorur ujin, shkopinjtë e gomës, gurët (!) dhe deri te plumbat e gomës.
Ajo që bie në sy është qasja e disa protestuesve për të goditur filialet e bankave të nivelit të dytë në qendër të Tiranës. Disa prej tyre janë shkatërruar. Nuk kanë munguar as persona që kanë hyrë brenda, duke kontrolluar sirtarët me shpresën se do të gjenin para, apo të tjerë që kanë sulmuar ATM-të me të njëjtin qëllim.
Por filialet bankare nuk janë ambiente ku paratë lihen nëpër sirtarë. Bankat mbajnë para fizike për veprimet e përditshme të klientëve, ndërsa ruajtja dhe transporti i vlerave monetare u nënshtrohen masave të posaçme të sigurisë.
Të thyesh xhamat, të shkatërrosh mobiliet apo edhe të futesh te sporteli, nuk të jep akses te paratë e bankës.
Kjo sa u përket atyre që kanë si qëllim të mbushin xhepat.
Por jo të gjithë janë të tillë.
Mes protestuesve ka edhe nga ata që sulmojnë bankat sepse i shohin si përfaqësuese të modelit të padrejtësisë dhe pabarazisë kundër të cilit po protestojnë.
Por, duhet kuptuar se bankat janë arteriet e ekonomisë.
Pa funksionimin e tyre vështirësohet edhe përmbushja e vetë kërkesave të protestuesve.
Si do të kalojnë fondet nga Thesari te një ndërmarrje që do të përmirësojë kushtet e konvikteve për shembull, përveçse përmes sistemit bankar?
Si do të derdhet paga e një prindi mësues apo mjek, fëmija i të cilit sot është në protestë?
Si do të kryhen pagesat e bizneseve ndaj punonjësve dhe furnitorëve?
Shembuj të tillë ka me mijëra.
Bankat nuk janë armiku!
Ato janë të domosdoshme për sistemin financiar dhe të pagesave të vendit, krahas rolit që kanë në mbështetjen e individëve dhe bizneseve me kredi.
Bankat janë aleate të qytetarëve dhe biznesit.
Tregu bankar shqiptar është zhvilluar ndjeshëm gjatë dekadave të fundit dhe është pjesë e pandashme e funksionimit të ekonomisë.
Frustrimi i disa protestuesve është i kuptueshëm.
Por Credins Bank, Tirana Bank, BKT, Raiffeisen Bank, Union Bank, Intesa Sanpaolo apo banka të tjera që janë sulmuar këto ditë, si në modelin e funksionimit, ashtu edhe në qasjen ndaj klientëve, nuk janë të njëjta me Iute Credit, për shembull, degët e së cilës u dogjën të parat.
Protestuesit duhet ta bëjnë këtë dallim.
Të godasësh bankat do të thotë të pengosh edhe shërbimet që përdorin çdo ditë vetë protestuesit dhe familjet e tyre.
Revolta ndaj padrejtësisë nuk triumfon duke dëmtuar arteriet përmes të cilave funksionon ekonomia. /skyweb.al
