Tregtarët e Vlorës dolën sërish sot në protestë para Teatrit “Petro Marko”, kundër vendimit të Këshillit Bashkiak për zhvendosjen e tyre nga zonat ku aktualisht ushtrojnë aktivitetin tregtar.
Shkak për protestën është bërë njoftimi i bashkisë, sipas të cilit tregtarët duhet të largohen brenda tre ditësh nga hapësirat aktuale, në kuadër të një projekti që parashikon krijimin e një tregu të ri.
View this post on Instagram
Sipas vendimit, tregtarët ushqimorë do të zhvendosen në tregun e Çoles, ndërsa tregtarët industrialë në tregun e Shumicës në Jalli të Nartës.
Gjatë protestës, pranë tregtarëve ka shkuar edhe ministrja e Jashtme, Elisa Spiropali, e cila ndodhet në Vlorë. Ajo u përball me kritika nga ana e protestuesve, ndërsa u shpreh se nuk ka qenë në dijeni të plotë të situatës. Spiropali premtoi se do të komunikojë me kryetaren e bashkisë për të sqaruar problematikat e ngritura nga tregtarët.
Protestuesit theksojnë se vendimi është marrë pa një konsultim real me ta dhe pa u ofruar garanci për kushtet minimale të punës në tregjet e reja. Sipas tyre, zhvendosja larg qendrës së qytetit do t’i largojë nga klientët dhe rrezikon seriozisht vazhdimësinë e aktivitetit tregtar.
Tregtarët shprehen se nga ky vendim preken drejtpërdrejt dhjetëra familje, të cilat sigurojnë të ardhurat e tyre nga ky aktivitet, ndërsa kërkojnë rishikimin e vendimit dhe një dialog të hapur me institucionet vendore. /skyweb.al
