Për dekada me radhë, udhëtarët kanë menduar se avionët me katër motorë janë më të sigurt se ata me dy, duke besuar se numri më i madh i motorëve ofron më shumë garanci në rast avarie.
Në të vërtetë, kjo ishte edhe arsyeja pse gjigantë si Boeing 747 apo Airbus A340 u projektuan me katër motorë, sidomos në vitet kur rregulloret kufizonin fluturimet e gjata mbi oqeane vetëm për avionët me më shumë se dy motorë.
Por zhvillimi i teknologjisë i ka ndryshuar rregullat e lojës.
Motorët modernë turbofan (reaktivë) janë bërë jashtëzakonisht të besueshëm, me norma dështimi shumë të ulëta.
Ky përparim solli dhe rregulloren ETOPS (Extended-range Twin-engine Operational Performance Standards), e cila lejoi avionët me dy motorë të kryejnë fluturime interkontinentale në distanca të gjata, pasi u vërtetua se mund të funksionojnë në mënyrë të sigurt edhe me një motor të vetëm në rast emergjence.
Statistikat e sigurisë së industrisë e konfirmojnë këtë realitet: avionët modernë me dy motorë, si Boeing 777, 787 apo Airbus A330 dhe A350, kanë rezultate po aq të mira, madje shpesh më të mira se ata me katër motorë.
Të dhënat e ICAO dhe IATA tregojnë se shumica dërrmuese e aksidenteve ajrore lidhen me faktorë të tjerë, si gabime njerëzore, kushtet atmosferike apo problemet e mirëmbajtjes, e jo me numrin e motorëve.
Kjo është arsyeja pse sot kompanitë ajrore në të gjithë botën i kanë kthyer sytë nga avionët me dy motorë: janë më ekonomikë, konsumojnë më pak karburant dhe janë po aq të sigurt sa kolosët me katër motorë.
Modelet me motorë të shumtë si Airbus A380 shërbejnë më shumë për arsye kapaciteti, sesa për një avantazh real në aspektin e sigurisë. /skyweb.al
