Qeveria daneze ka vendosur të rishqyrtojë për herë të parë pas katër dekadash mundësinë e nisjes së një programi të energjisë bërthamore, duke shfuqizuar një vendim që ka qenë në fuqi prej më shumë se 40 vitesh.
Ndryshe nga fqinjët e saj si Suedia apo Gjermania, të cilat kanë ndërtuar dhe operuar centrale bërthamore civile, Danimarka nuk ka pasur kurrë një program të tillë. Vendi ka përdorur vetëm tre reaktorë të vegjël kërkimorë, i fundit prej të cilëve është mbyllur në vitin 2001.
Vendimi i qeverisë vjen në një moment ku shumë vende po tregojnë interes të shtuar për energjinë bërthamore, kryesisht për të përballuar rritjen e pritshme të konsumit të energjisë elektrike nga qendrat e të dhënave për Inteligjencën Artificiale.
Por Danimarka ka një arsye tjetër: frikën nga ndërprerjet e energjisë, si ajo që goditi kohët e fundit gadishullin Iberik.
Ashtu si Spanja dhe Portugalia, Danimarka është shumë e varur nga energjia e rinovueshme që varen nga kushtet atmosferike, si era dhe dielli.
Edhe pse këto burime janë të pastra dhe të qëndrueshme për mjedisin, ato nuk ofrojnë qëndrueshmëri teknike në rrjetin elektrik, sidomos në lidhje me ruajtjen e frekuencës së tensionit elektrik (50 Hz në Europë), që është jetike për pajisjet elektrike dhe për balancimin midis prodhimit dhe konsumit të energjisë.
Centralet tradicionalë, si ata me gaz, qymyr apo energji bërthamore, prodhojnë energji në mënyrë sinkrone dhe kanë një inerci të natyrshme mekanike, që ndihmon në ruajtjen e stabilitetit të frekuencës. Nga ana tjetër, era dhe dielli nuk e ofrojnë këtë inerci, sipas The Telegraph.
Kjo i bën rrjetet moderne më të ekspozuara ndaj kolapsit në rast defektesh.
Danimarka, që është një nga kampionët e gjelbër të Evropës, tani po e rishikon qasjen e saj ndaj sigurisë energjetike, duke parë energjinë bërthamore si një burim të qëndrueshëm dhe teknikisht të domosdoshëm për stabilitetin e rrjetit./skyweb.al
