Kryeministri Edi Rama ka deklaruar se shumica qeverisëse do ta vijojë betejën institucionale pas vendimit të Gjykatës Kushtetuese, e cila nuk arriti të marrë një vendim për pezullimin nga detyra të zëvendëskryeministres Belinda Balluku.
Rama e cilësoi situatën si një “mosvendimmarrje” që, sipas tij, e kthen në fuqi pezullimin dhe krijon një precedent të rrezikshëm për funksionimin e demokracisë.
Në podkastin e tij të radhës, kryeministri u shpreh se qeveria është vënë “peng” nga pushteti gjyqësor përmes një mekanizmi që, sipas tij, nuk ekziston në asnjë vend tjetër demokratik.
Ai kritikoi faktin që një anëtar i qeverisë mund të pezullohet nga një prokuror dhe një gjyqtar në një seancë paraprake, pa nisur ende gjykimi, duke e konsideruar këtë praktikë si të papranueshme dhe antidemokratike.
Rama theksoi se zëvendëskryeministrja Balluku nuk akuzohet për korrupsion, madje as nga vetë prokurori që ka kërkuar pezullimin, ndërsa e gjithë çështja, sipas tij, lidhet me një shpikje procedurale të drejtësisë shqiptare.
Ai argumentoi se mosvendimmarrja e Gjykatës Kushtetuese jo vetëm që nuk e zgjidh situatën, por e përkeqëson atë, duke lënë në fuqi një vendim që cenon ndarjen e pushteteve.
Sipas kryeministrit, kjo situatë krijon rrezikun që çdo anëtar i qeverisë, madje edhe Presidenti i Republikës, të mund të pezullohet në mënyrë arbitrare, pa një proces të rregullt gjyqësor.
Ai e quajti këtë një problem parimor, që shkon përtej rastit konkret dhe që prek thelbin e pavarësisë së pushtetit ekzekutiv nga gjyqësori.
Në këtë kontekst, Rama paralajmëroi se shumica do ta vazhdojë betejën për zhbërjen e këtij precedenti, duke e konsideruar atë një domosdoshmëri për garantimin e shtetit të së drejtës dhe funksionimit normal të institucioneve.
Ai shtoi se kjo përballje nuk është politike, por lidhet me mbrojtjen e parimeve themelore të demokracisë.
Kryeministri reagoi gjithashtu ashpër ndaj atyre që, sipas tij, po e festojnë mosvendimin e Gjykatës Kushtetuese dhe po mbështesin arrestime dhe masa ndëshkuese pa gjyq.
Ai përmendi edhe raste të tjera të fundit të fletë-arresteve masive, duke i cilësuar si shkelje të standardeve europiane të drejtësisë.
Në përfundim, Rama deklaroi se lufta për drejtësi, shtet ligjor dhe integrim europian, sipas tij, ka aktualisht një garant të vetëm, shumicën qeverisëse dhe drejtimin e saj, duke theksuar se kjo betejë do të vazhdojë pavarësisht kostove politike. /skyweb.al
