Plisi i bardhë, simbol mijëvjeçar që ka sfiduar kohën dhe ka shoqëruar breza të tërë shqiptarësh – sot kërkon vëmendjen dhe njohjen e botës. Përmes një peticioni të nisur online, qindra qytetarë u kanë bërë thirrje institucioneve ndërkombëtare që ky artefakt unik të përfshihet në listën e Trashëgimisë Kulturore Jomateriale të Njerëzimit të UNESCO-s.
I punuar me dorë nga leshi i bardhë dhe me një mjeshtëri të trashëguar brez pas brezi, plisi nuk është thjesht një element veshjeje, por një dëshmi e gjallë e historisë, traditës dhe qëndrueshmërisë së identitetit kombëtar shqiptar.
Kjo kapelë autoktone është përdorur nga shqiptarët prej shekujsh dhe njihet me emërtime të ndryshme në varësi të krahinës, si qeleshe, kësulë apo qylaf. Megjithatë, pavarësisht emrit, simbolika e saj mbetet e njëjtë: shenjë e përkatësisë dhe e identitetit shqiptar.
Në një epokë globalizimi, ku identitetet kulturore rrezikojnë të zbehen, nisma synon që plisi të mos mbetet vetëm një objekt muzeal apo një kujtim në fotografitë e së shkuarës, por të marrë një njohje zyrtare si pasuri kulturore me vlerë universale. Përfshirja në listën e UNESCO-s do të ndihmonte jo vetëm në mbrojtjen e teknikës tradicionale të punimit, por edhe në promovimin e turizmit kulturor në trojet shqiptare.
Thirrja e peticionit është e drejtpërdrejtë: çdo firmë është një hap më shumë drejt ruajtjes së kësaj trashëgimie të gjallë dhe drejt forcimit të lidhjes mes së shkuarës dhe brezave të ardhshëm. Peticioni ka mbledhur deri tani rreth 4 mijë firma.
