Prokuroria e Posaçme kundër Korrupsionit dhe Krimit të Organizuar ka përfunduar hetimet dhe ka dërguar për gjykim ish-kryetarin e Bashkisë Memaliaj, Gjolek Guci, ish-nënkryetaren Edmonda Harizi, ish-drejtorin e Shërbimeve Publike Feta Hoxha dhe biznesmenin Bersant Ylli, në lidhje me një procedurë tenderimi me vlerë rreth 5 miliardë lekë të vjetra për ndërtimin e ujësjellësit rajonal që përfshin disa fshatra dhe qytetin e Memaliajt.
Hetimi nisi pas një kallëzimi penal të Kontrollit të Lartë të Shtetit, depozituar më 28 tetor 2024. Më 4 nëntor 2024 u regjistrua procedimi penal për veprën “Shkelja e barazisë së pjesëmarrësve në tendera apo ankande publike”.
Objekt i hetimit ka qenë procedura e prokurimit për “Ndërtimin e Ujësjellësit Rajonal për fshatrat Vasjar, Iliras, Qesarat, Anë-Vjosë, Toç, Lulëzim, Zhulaj, Krahës dhe qytetin Memaliaj”, e zhvilluar në vitin 2021 nga Bashkia Memaliaj si autoritet kontraktor.
Sipas SPAK, më 21 shtator 2020, Gjolek Guci, në cilësinë e kryetarit të bashkisë, ka nënshkruar një kontratë dhurimi me shoqërinë “Artreum Generation” sh.p.k në pronësi të Lorenc Bamit, e përfaqësuar nga administratori Aldo Shehu, ndërsa projekti për ndërtimin e ujësjellësit është miratuar nga vetë titullari i bashkisë.
Nga hetimet ka rezultuar se projekti i ujësjellësit ishte hartuar nga kompania “Artreum Generation” dhe i ishte dhuruar bashkisë. Më pas, i njëjti projekt është tenderuar dhe është shpallur fitues bashkimi i operatorëve ekonomikë “KEG” sh.p.k. & “ED Konstruksion” sh.p.k., të cilët, sipas aktakuzës, kishin mangësi në dokumentacion, sidomos në kriteret për kapacitetin teknik.
Sipas SPAK, këto kompani kanë përzgjedhur si nënkontraktore pikërisht “Artreum Generation” sh.p.k., e cila kishte hartuar dhe dhuruar projektin fillestar. Prokuroria vlerëson se pranimi i këtij nënkontraktimi ka ndodhur në kushtet e konfliktit të interesit dhe në kundërshtim me kriteret ligjore për nënkontraktorët.
Fondi për objektin, në vlerën 493.183.572 lekë, ishte ndarë në zëra për ndërtim, montim, drejtim dhe kolaudim të punimeve. Sipas hetimeve, vlera e miratuar përkon me kostot e parashikuara në projektin e dhuruar nga “Artreum Generation”, e cila më pas rezultoi nënkontraktore në zbatimin e punimeve.
Pas analizës së dokumentacionit të prokurimit, SPAK konkludon se anëtarët e Komisionit të Vlerësimit të Ofertave, Edmonda Harizi, Feta Hoxha, Bersant Ylli dhe titullari i autoritetit kontraktor, Gjolek Guci, në bashkëpunim me njëri-tjetrin, kanë krijuar avantazhe dhe privilegje të padrejta për operatorë të caktuar ekonomikë, duke i kualifikuar dhe shpallur fitues pavarësisht mangësive në dokumentacion.
Më 28 janar 2026 është vendosur ndarja e procedimit penal nr. 216 në procedimin nr. 216/1 për hetime të mëtejshme lidhur me zbatimin e kontratës, për të cilën do të kryhen veprime të tjera hetimore.
SPAK i ka dërguar Gjykatës së Posaçme kërkesën për gjykimin e procedimit penal nr. 216/1 të vitit 2024 në ngarkim të:
Gjolek Guci, ish-kryetar i Bashkisë Memaliaj
Edmonda Harizi, ish-nënkryetare
Feta Hoxha, ish-drejtor i Shërbimeve Publike
Bersant Ylli, administrator i subjektit “Bersant Ylli”
Të gjithë akuzohen për veprën penale “Shkelja e barazisë së pjesëmarrësve në tendera apo ankande publike”, kryer në bashkëpunim, sipas neneve 258 dhe 25 të Kodit Penal, përpara ndryshimeve të vitit 2021.
