Më 18 shkurt 2026, Tirana do të presë takimin ministror për Korridorin VIII, një nga projektet më të rëndësishme infrastrukturore në rajon, me synimin për të rritur koordinimin politik dhe për të përshpejtuar zbatimin e segmenteve kyçe të tij. Aktiviteti do të zhvillohet në Pallatin e Brigadave, me pjesëmarrjen e delegacioneve nga Shqipëria, Maqedonia e Veriut, Bullgaria, Italia dhe Rumania, si dhe përfaqësues nga vende dhe institucione partnere.
Korridori VIII konsiderohet një bosht strategjik që lidh Adriatikun me Detin e Zi, duke krijuar një aks të ri transporti për mallra, pasagjerë dhe lëvizshmëri ushtarake, në një moment kur çështjet e sigurisë dhe ndërlidhjes rajonale janë rikthyer në qendër të agjendës evropiane. Takimi në Tiranë pritet të konfirmojë angazhimin politik për thellimin e bashkëpunimit ndërqeveritar dhe për harmonizimin e planeve kombëtare me prioritetet e Bashkimit Evropian në fushën e transportit dhe sigurisë.
Në seancën plenare do të diskutohet roli i Korridorit VIII në arkitekturën e re strategjike të Evropës, duke e trajtuar atë si një instrument që ndërthur zhvillimin ekonomik me dimensionin e sigurisë dhe integrimit rajonal. Pritet që në përfundim të ministerialit të miratohet një deklaratë e përbashkët, ndërsa agjenda do të përfshijë edhe takime dypalëshe mes delegacioneve dhe një konferencë për shtyp.
Paralelisht me takimin ministror, në ambientet e Banka e Shqipërisë do të mbahet Forumi Ekonomik për Korridorin VIII, me fokus shndërrimin e projektit nga një lidhje infrastrukturore në një platformë konkrete për rritje ekonomike rajonale. Forumi do të mbledhë përfaqësues të qeverive, institucioneve evropiane, institucioneve financiare ndërkombëtare dhe aktorëve të sektorit privat.
Diskutimet do të përqendrohen në lehtësimin e tregtisë, zhvillimin industrial përgjatë aksit të korridorit dhe rritjen e konkurrueshmërisë së ekonomive të rajonit. Një nga objektivat kryesore është mobilizimi i instrumenteve financiare evropiane dhe ndërkombëtare për të garantuar financimin e projekteve prioritare, si dhe formulimi i rekomandimeve konkrete për përshpejtimin e investimeve.
Takimi i Tiranës synon të ripozicionojë Korridorin VIII si një projekt me ndikim të drejtpërdrejtë në rritjen ekonomike, sigurinë dhe integrimin rajonal, në një kohë kur ndërlidhja infrastrukturore po shihet si një nga shtyllat kryesore të stabilitetit dhe zhvillimit në Evropën Juglindore.
