Raportimet për incidente me motorët e avionëve dhe raste të ashtuquajtura “bird strike” janë shtuar muajt e fundit, duke nxitur shqetësim tek pasagjerët. Pamje me flakë nga turbina, kthime emergjente në aeroport apo ulje të menjëhershme janë bërë virale në rrjetet sociale, duke krijuar perceptimin se fluturimi po bëhet më i rrezikshëm.
Megjithatë, ekspertët e aviacionit theksojnë se rritja lidhet kryesisht me shtimin e ndjeshëm të trafikut ajror pas pandemisë. Me më shumë fluturime në qiell, është statistikisht e pritshme që të raportohen më shumë incidente, edhe pse përqindja e tyre ndaj totalit të operimeve mbetet shumë e ulët.
Një nga rastet më të zakonshme është goditja nga zogjtë, e njohur si “bird strike”. Ky është një rrezik i njohur prej dekadash në aviacion dhe motorët modernë testohen posaçërisht për të përballuar situata të tilla. Gjatë certifikimit, turbinat provohen me simulime reale për të garantuar që në rast goditjeje, dëmi të jetë i kontrolluar dhe avioni të mund të vazhdojë fluturimin ose të kthehet në aeroport në mënyrë të sigurt.
Edhe në rastet e dëmtimit të motorit, shumica klasifikohen si “contained failures”, që do të thotë se fragmentet mbeten brenda strukturës mbrojtëse të motorit. Rastet kur pjesë dalin jashtë janë jashtëzakonisht të rralla dhe përbëjnë përjashtim, jo rregull.
Një tjetër faktor që ka ndikuar në raportimet e fundit është presioni mbi zinxhirin global të mirëmbajtjes dhe prodhimit të pjesëve, si dhe kontrollet shtesë të vendosura për disa modele motorësh. Këto masa, në thelb, janë pjesë e sistemit të sigurisë që funksionon përmes monitorimit të vazhdueshëm dhe ndërhyrjes parandaluese.
Probleme me motorët mbajnë 38 avionë në tokë, kriza te WizzAir do të zgjasë të paktën deri në 2027
Statistikat ndërkombëtare konfirmojnë se aviacioni mbetet forma më e sigurt e transportit masiv. Çdo incident, sado i vogël, hetohet në detaje dhe përdoret për të përmirësuar më tej standardet teknike dhe procedurat operacionale.
Në këtë kontekst, megjithëse numri i rasteve të raportuara mund të duket në rritje, nuk ka tregues që niveli real i rrezikut për pasagjerët të jetë shtuar. Sistemi i sigurisë ajrore është ndërtuar pikërisht mbi analizën e çdo anomalie, duke e bërë fluturimin një nga mënyrat më të kontrolluara dhe të sigurta të udhëtimit. /skyweb.al
