Një ngjarje e rëndë është regjistruar në orët e para të mëngjesit në lagjen e Re të Bulqizës, ku automjeti i gazetarit Sami Curri është përfshirë nga flakët rreth orës 02:45, ndërsa ishte i parkuar pranë pallatit ku ai banon.
Sipas të dhënave paraprake, dyshohet se zjarri mund të jetë vendosur qëllimisht dhe të ketë lidhje me aktivitetin e tij profesional.
Në vendngjarje ndërhynë shërbimet zjarrfikëse, por mjeti është djegur plotësisht.
Policia ka nisur hetimet për zbardhjen e plotë të rrethanave dhe identifikimin e autorëve të mundshëm.
Vetë gazetari e ka cilësuar ngjarjen si një akt të paramenduar, me qëllim intimidimin dhe pengimin e punës së tij në terren. Sipas tij, bëhet fjalë për një mesazh të drejtpërdrejtë ndaj aktivitetit që ushtron prej vitesh.
Curri theksoi se nuk ndihet i trembur apo i kërcënuar dhe se do të vijojë ushtrimin e profesionit, duke e konsideruar gazetarinë një mision në shërbim të interesit publik.
Ai prej rreth dhjetë vitesh ushtron profesionin në qarkun e Dibrës, duke u fokusuar në raportimin e problemeve të qytetarëve, monitorimin e institucioneve vendore dhe ndjekjen e çështjeve të drejtësisë.
Gazetari shtoi se në javët e fundit ka qenë në kontakt me persona të prekur nga temat që ka trajtuar, çka e shton dyshimin se ngjarja mund të lidhet me punën e tij.
Pavarësisht incidentit, ai deklaroi se nuk do të tërhiqet përballë presioneve apo tentativave për frikësim./skyweb.al
