Tetëdhjetë e tre vjet pas fundosjes së saj, një nga silurueset më të rralla të marinës gjermane të Luftës së Dytë Botërore është zbuluar në fundin e detit Jon. Anija LS 6 për dekada ishte konsideruar e humbur dhe që, sipas të dhënave historike të mbledhura deri më tani, është e vetmja anije e lehtë sulmuese me shpejtësi të lartë, e mbetur në botë, shkruan Protothema.
Zbulimi nuk ishte rastësi. Ai ishte rezultat i një kërkimi që kishte nisur 13 vjet më parë, kur dokumente nga arkivat ushtarake gjermane zbuluan vendndodhjen e mundshme ku LS 6 ishte fundosur në shtator të vitit 1943, ndërsa po tërhiqej nga Korfuzi drejt Pireut.
Informacioni arriti te studiuesi i historisë Giorgos Karelas, i cili bashkëpunoi për disa vite me zhytës dhe studiues të tjerë për të organizuar kërkimet. Hapi i parë vendimtar erdhi kur u identifikua një objektiv në fundin e detit, në një thellësi rreth 96 metra, pranë Prevezës.
Historia e anijes është e lidhur ngushtë me operacionet e Kriegsmarine, marinës ushtarake gjermane, në Egje pas kapitullimit të Italisë. LS 6 ishte sjellë në Greqi së bashku me anijen motër LS 5, për misione kundër nëndetëseve.
