Rreth 167 milionë euro do të depozitohen në Fondin e Veçantë të Pensioneve të krijuar pranë Bankës së Shqipërisë, në kuadër të masave për forcimin e qëndrueshmërisë financiare të sistemit të pensioneve.
Ministria e Financave bëri të ditur se fondet buxhetore të papërdorura nga ministritë dhe institucionet publike gjatë vitit 2025 janë transferuar tashmë në këtë fond, duke u konsideruar si një hap konkret në zbatimin e politikave për reformimin e skemës së pensioneve.
Sipas institucionit, ky transferim përfaqëson një angazhim për menaxhim më të përgjegjshëm të financave publike dhe për sigurimin e stabilitetit afatgjatë të skemës, ndërsa reforma e pensioneve do të vijojë të zbatohet me qëllim ndërtimin e një sistemi më të drejtë dhe më të besueshëm për qytetarët.
Ministria sqaron se procedura është realizuar në zbatim të Aktit Normativ nr. 11, datë 19 dhjetor 2025, si dhe në përputhje me kuadrin ligjor për menaxhimin e sistemit buxhetor.
Sipas saj, depozitimi i këtyre fondeve synon të rrisë sigurinë financiare të skemës dhe të garantojë mbështetje më të qëndrueshme për pensionistët në vitet në vijim. /skyweb.al
