Rreth 68 për qind e evropianëve mendojnë se vendet e tyre përballen me kërcënime, ndërsa 42 për qind shprehen se siguria e tyre personale është në rrezik, sipas një sondazhi të publikuar të premten.
Sondazhi Flash Eurobarometer 574 u realizua nga kompania me seli në Bruksel Demoscopy, me kërkesë të Komisioni Evropian, në prag të Konferencës së Sigurisë në Mynih.
Rezultatet tregojnë se perceptimi më i lartë i kërcënimit është regjistruar në Francë, me 80 për qind, pasuar nga Holanda dhe Danimarka me nga 77 për qind, si dhe Gjermania me 75 për qind.
Sa i përket investimeve në mbrojtje, 32 për qind e të anketuarve mendojnë se Bashkimi Evropian nuk ka ndërmarrë masa të mjaftueshme, ndërsa 34 për qind besojnë se vendet e tyre kanë dështuar në këtë drejtim.
Megjithatë, 52 për qind e evropianëve shprehin besim tek BE-ja për forcimin e sigurisë dhe mbrojtjes. Niveli më i lartë i besimit është shënuar në Luksemburg me 76 për qind, i ndjekur nga Portugalia me 74 për qind dhe Lituania me 71 për qind.
Në të kundërt, besimi është më i ulët në tre vendet më të mëdha anëtare, Italia, Gjermania dhe Franca – ku 47 për qind e gjermanëve dhe italianëve, si dhe 40 për qind e francezëve, nuk pajtohen me këtë pikëpamje.
Pothuajse tre të katërtat e pjesëmarrësve mbështesin nivelin aktual të investimeve të BE-së në mbrojtje ose kërkojnë rritjen e tyre. Mbështetja më e lartë është regjistruar në Portugali me 89 për qind, pasuar nga Finlanda me 83 për qind, Lituania dhe Spanja me nga 80 për qind, si dhe Danimarka me 78 për qind.
Sondazhi u zhvillua online nga 5 deri më 12 janar, me rreth 27 mijë pjesëmarrës nga të 27 shtetet anëtare të BE-së. /skyweb.al
