Inteligjenca artificiale po gjithmonë e më shumë terren në sistemin shëndetësor, duke ndryshuar mënyrën si diagnostikohen dhe trajtohen pacientët. Mjekja radiologe, Blerina Saraçi tregon eksperiencën e përditshme, ndërsa I jep edhe përgjigje pyetjes nëse Inteligjenca artificiale do zëvendësojë mjekët.
“Unë jam mjeke radiologe dhe ne jemi specialiteti më i ndjeshëm ndaj zhvillimeve të reja në IA. Kemi filluar të implementojmë disa nga ato që ajo ofron si risi që na ndihmojnë në punën tonë të përditshme dhe sigurisht do vazhdohet të implementohen edhe risi të tjera. Do jetë një ndihmë e madhe, por nuk I zëvendëson mjekët. Për të bërë një punë më të mirë dhe në një kohë më të shkurtër, inteligjenca artificiale ndihmon ndjeshëm”, tha Saraçi.
Përdorimi i inteligjencës artificiale nuk është vetëm çështje teknologjie, por edhe investimi. Sistemet e avancuara të përpunimit të imazheve, licencat e softuerëve dhe pajisjet e integruara kanë një kosto të konsiderueshme. Saraçi thotë se këto janë kosto që duhen përballuar.
“Implementimi tashmë ka filluar, që në mënyrën se si ne I përgatisim, I përpunojmë imazhet, si arrijmë të imazhi fundor. Sigurisht që ka një kosto relativisht të lartë, por janë buxhete që duhen përballuar për cilësinë e ekzaminimeve dhe kanë filluartë implementohen”, u shpreh mjekja.
Por cilat janë fushat ku teknologjia gjen më shumë terren?
“Ajo do implementohet në të gjitha fushat, që nga mjekësia e familjes, me mënyrën si do organizohen pacientët, deri tek kirurgjia me robotikën dhe gjithçka. IA është e pashmangshme tashmë në të gjitha fushat e operimit.”
Trajnimi i mjekëve dhe stafit teknik do të jetë po aq i rëndësishëm sa vetë investimi në pajisje dhe softuerë, pasi përdorimi i inteligjencës artificiale kërkon njohuri të reja teknologjike dhe aftësi për të interpretuar saktë rezultatet që ajo ofron. Nëse sistemi nuk investon paralelisht në formim profesional dhe përditësim të vazhdueshëm, rreziku është që teknologjia të jetë prezente, por të mos shfrytëzohet në potencialin e saj të plotë. /Tvscan
