Shkarkimi nga detyra i drejtoreshës së AKSHI, Mirlinda Karçanaj, erdhi në një moment kur pozitat e saj juridike ishin rënduar ndjeshëm nga hetimet e SPAK për abuzime me tendera publikë në sektorin e teknologjisë së informacionit.
Një rol vendimtar në zhvillimet e fundit duket se ka pasur dëshmia e ish-vartësit të saj, Daniel Shima.
Karçanaj, e cila ndodhet nën masën e sigurisë “arrest shtëpie”, dyshohet se ka qenë pjesë e një skeme të manipulimit të tenderëve, ku sipas hetimeve ka orientuar përgatitjen e kritereve teknike në mënyrë që kontratat të përfitoheshin nga kompani të lidhura me Ermal Beqirin.
Hetimet e SPAK kanë zbuluar prova që lidhen me vendimmarrjen dhe proceset brenda institucionit, përfshirë materiale të sekuestruara në serverë dhe dokumente të brendshme.
Dëshmia e Daniel Shimës, i cili u largua nga detyra menjëherë pasi u thirr për herë të parë në prokurori, ka sjellë detaje që konsiderohen kyçe për zbërthimin e mekanizmit të vendimarrjes te AKSHI.
Ai ka përshkruar një strukturë vendimmarrjeje ku, sipas deklarimeve, drejtuesja kontrollonte dhe orientonte proceset me qëllim favorizimin e operatorëve të lidhur me persona të caktuar.
Këto deklarime, në kombinim me provat e tjera, kanë rënduar jo vetëm pozitat e Karçanajt, por edhe të personave të tjerë të përfshirë në hetim, të cilët dyshohen si organizatorë të skemës.
Në dosjen hetimore përfshihet gjithashtu një transaksion financiar i dyshuar që lidhet me blerjen e një automjeti me vlerë rreth 39 mijë euro.
Sipas hetuesve, blerja është kryer përmes subjekteve të lidhura me persona nën hetim dhe automjeti rezulton në përdorim të familjarëve të ish-drejtoreshës, element që po verifikohet për të përcaktuar nëse përbën përfitim të paligjshëm./skyweb.al
