Nga Skyweb.al
Kryeministri Rama sfidoi hapur drejtësinë e re dje brenda ambienteve të AKSHI-t, ku motra e personit të konsideruar nga SPAK si truri i baterdisë me tenderet, Ergys Agasi, është drejtoreshë e tenderëve.
Rama u premtoi punonjësve të AKSHI-t rritje të papara të pagave, si askush në Shqipëri, një fjali që diku u lexua edhe si tentativë për të blerë heshtjen e atyre që çfarë s’kanë parë e çfarë s’kanë dëgjuar në ato korridore.
Ndërkohë, ai u kujdes edhe të “fshinte” lotët e ish-drejtoreshës Mirlinda Karçanaj, gruas që firmosi deri në fund çdo tender gllabërues për taksat e vendit, me kosto disa fish, duke qepur kushtet teknike sipas nevojave të kompanive të Ermal Beqirit, gjithçka nën orientimin e Ergys Agasit.
“Jam i pikëlluar për gjithçka ajo që po kalon, në radhë të parë për agresionin barbar të portaleve dhe të rrjeteve të dhunës verbale që e asociojnë me gjëra të cilat nuk kanë asnjë lidhje me Mirlindën.
Edhe në këtë rast unë nuk futem në meritën e çështjes në fjalë, nuk kam dijeni për detaje që lidhen me aktivitetin e atyre kompanive të përfshira në një hetim, por unë kam dijeni për faktin që Mirlinda është një nënë e vetme me dy fëmijë, ka një karrierë nga më të shkëlqyerat në shërbimin publik”, tha Rama për drejtoreshën Mirlinda.
Karçanaj rezulton të jetë një ndër vizitoret më të shpeshta në zyrën private të Ergys Agasit, ku ai i thërret edhe “o ti, zemra!”, krahas Erion Ismailit, ish-zv.drejtorit të Policisë së Tiranës.
Madje, në dosje përmenden edhe foto dhe citime bisedash mes Ergys Agasit dhe Mirlinda Karçanajt, ku sipas përmbajtjes duket se ajo vepronte nën ndikimin e tij në përcaktimin e fituesve të tenderëve.
Kryeministri Rama u shfaq dje si fshirës lotësh i një drejtoreshe që ka kalëruar taksat e shqiptarëve pa iu trembur qerpiku, një situatë që nuk ndodh në asnjë vend të qytetëruar, përveç nëse gjithçka është bërë me “iznin” e shefit të madh.
Vetëm kjo, shpjegon pikëllimin e djeshëm të Ramës për Mirlinda Karçanajn, ndërkohë që pikëllimi i tij duhej të ishte më i madh për taksat e qytetarëve. /skyweb.al
