Autoriteti Rrugor Shqiptar ka njoftuar se gjatë ditës së sotme do të kryhet një shpërthim i kontrolluar në zonën e Llogarasë, në funksion të vijimit të punimeve për ndërtimin e rrugëve lidhëse të këtij segmenti.
Sipas njoftimit zyrtar, ndërhyrja është planifikuar të realizohet në intervalin kohor 11:00 deri në 11:30 dhe do të përdoren sasi të vogla eksplozivi për hapjen e trasesë së rrugës. ARRSH thekson se procesi do të kryhet pa penguar qarkullimin e mjeteve.
Institucioni sqaron se punimet janë koordinuar me Policinë e Shtetit për të garantuar menaxhimin e trafikut dhe sigurinë gjatë kryerjes së shpërthimit.
Autoriteti Rrugor Shqiptar u ka bërë thirrje qytetarëve dhe drejtuesve të mjeteve për mirëkuptim deri në përfundimin e këtij procesi pune, i cili është pjesë e fazës së avancimit të projektit për infrastrukturën lidhëse në Llogara.
