Bizneset do të kenë mundësinë të lehtësohen nga çdo gjobë apo kamatëvonese të marrë ndër vite për mospagimin në afat të sigurimeve shoqërore të të punësuarve, nëse plotësojnë kushtin për ti paguar detyrimet e prapambetura deri në fund të këtij vitit.
Referuar ligjit i cili hyri në fuqi në Janar, “Për fshirjen, shuarjen dhe pagesën e detyrimeve tatimore ndaj administratës tatimore qendrore e vendore dhe e detyrimeve të pagueshme në doganë”, gjobat dhe kamatëvonesat për sigurimet shoqërore e shëndetësore, që u përkasin periudhave tatimore deri në datën 31 dhjetor 2014, që rezultojnë të llogaritura apo të regjistruara në llogarinë e tatimpaguesit, do të fshihen, por përsëri detyrimi për kontributin do të mbetet.
Ndërsa në nenin 6 citohet se “Shuhen dënimet administrative (gjobat dhe kamatëvonesat) për sigurimet shoqërore e shëndetësore, që u përkasin periudhave tatimore nga data 1 janar 2015 deri në datën 31 dhjetor 2024, që rezultojnë të llogaritura apo të regjistruara në llogarinë e tatimpaguesit, me kushtin që të paguhet 100% kontributi brenda datës 31.12.2026.
Pra e thënë ndryshe, nëse bizneset apo institucionet publike që kanë detyrime të papaguara të sigurimeve shoqërore dhe shëndetësore të të punësuarve, marrin përsipër ti shlyejnë brenda këtij vitit, do të dalin nga lista e debitorëve dhe nuk do të paguajnë penalitete.
Referuar një raporti më të fundit të Kontrollit të Lartë të Shtetit detyrimet që kanë bizneset ndaj punonjësve për sigurimet shoqërore të papaguara arrijnë në rreth 20 miliardë lekë apo 200 milionë euro. Numri i subjekteve debitorë rezulton në rreth 120 mijë biznese. Në total, detyrimet e papaguara për sigurimet shoqërore për vitin 2024 përfshijnë 17.18 miliardë lekë principal, 2.08 miliardë lekë gjoba dhe 968 milionë lekë interesa, duke çuar vlerën e përgjithshme të borxhit në 20.2 miliardë lekë. Ndërsa 79.6 milionë lekë apo rreth 800 mijë euro janë detyrime të prapambetura të pushtetit qendror dhe vendor.
Më këtë iniciativë, qeveria synon të lehtësojë bizneset dhe të rrisë arkëtimet në buxhet. /Scan
