Prej disa ditësh rruga që lidh Tiranën me juglindjen e vendit vijon të mbetet e bllokuar për shkak të shembjes së ndodhur në aksin Librazhd-Prrenjas, duke krijuar vështirësi të mëdha në qarkullim dhe në lëvizjen drejt Korçës.
Në këtë situatë, Kryeministri Edi Rama ka planifikuar një vizitë në qytetin e Korçës, por për shkak të bllokimit të rrugës ka zgjedhur të udhëtojë me helikopter. Sipas informacioneve, Policia e Korçës është njoftuar se kreu i qeverisë do të ulet në orën 11:00 për të marrë pjesë në inaugurimin e Polit të Dijes.
Nga Kryeministria nuk ka pasur një njoftim zyrtar për këtë vizitë, ndërsa mediat lokale në Korçë kanë raportuar mbi mbërritjen e tij, duke cituar burime nga terreni.
Ndërkohë, sot në mesditë ishte planifikuar rihapja e aksit, pas dëmtimeve të shkaktuara në segmentin e njohur si “Arra e Gurrës”. Por gjatë ditës situata është përkeqësuar sërish, pasi janë regjistruar rrëshqitje të reja të tokës që kanë detyruar autoritetet të anulojnë planet për hapjen e rrugës.
Për shkak të rrezikshmërisë së lartë, edhe mjetet e tonazhit të rëndë që po punonin për stabilizimin dhe hapjen e segmentit janë zhvendosur nga vendi i ngjarjes, ndërsa pritet një rivlerësim i situatës nga strukturat teknike. /skyweb.al
