Problemet në aksin rrugor Librazhd-Pogradec kanë shkaktuar pasoja edhe në rrjetin energjetik, duke krijuar një situatë emergjente në zonë.
Që prej ditës së djeshme, një shtyllë e tensionit të mesëm në linjën 110 kV Librazhd – HEC Egnatia rrezikon shembjen, si pasojë e dëmtimeve të shkaktuara nga rrëshqitjet e tokës dhe destabilizimi i terrenit pranë segmentit rrugor.
Për të ndërhyrë në mënyrë të sigurt, sot energjia elektrike do të stakohet nga ora 10:00 deri në 17:00, interval gjatë të cilit do të kryhen punimet për demontimin e shtyllës së rrezikuar.
Pa furnizim me energji do të mbeten disa zona në rrethin e Librazhdit, përfshirë Babje, Buzgar, Drapata, Dragostunjë, Ferrë, Frarë, Hotolisht, Gurëkuqe si dhe HEC-i Xhyrë.
Në terren pritet të dislokohen forca të Ushtrisë dhe efektivë të Forcave të Ndërhyrjes së Shpejtë, me qëllim garantimin e perimetrit të sigurisë dhe parandalimin e çdo rreziku për jetën e qytetarëve. Prania e tyre synon mbajtjen nën kontroll të zonës, shmangien e hyrjeve të paautorizuara dhe sigurimin e mbarëvajtjes së operacioneve teknike.
Ndërkohë, pas fundosjes dhe rrëshqitjes masive të tokës, autoritetet vendore dhe strukturat e emergjencave civile kanë evakuuar dy familje që banonin pranë segmentit të dëmtuar rrugor.
Familjet janë sistemuar përkohësisht në ambiente të sigurta, ndërsa pritet vlerësimi i plotë i situatës nga ekspertët gjeologë dhe inxhinierët e ndërtimit për të përcaktuar rrezikun dhe masat e mëtejshme. /skyweb.al
