Administrata Tatimore është alarmuar nga një rritje drastike e detyrimeve të papaguara nga biznesi për muajin maj. Përmes një njoftimi zyrtar Tatimet bënë të ditur se vetëm gjatë muajit të kaluar, borxhi tatimor u rrit me 4.7 miliardë lekë ose mbi 47 milionë euro.
“Administrata Tatimore bën me dije se gjatë muajit maj 2025 është evidentuar një rritje e detyrimeve tatimore të papaguara në vlerën 4.7 miliardë lekë,” thuhet në njoftim.
Drejtoria e Tatimeve u ka bërë thirrje bizneseve debitore që të paguajnë taksat përndryshe do të përballen me sanksionet e parashikuar në legjislacionin tatimor.
“Mospagimi në afat i detyrimeve tatimore, sipas ligjit nr. 9920/2008 “Për procedurat tatimore në Republikën e Shqipërisë”, i ndryshuar, ju ngarkon jo vetëm me gjoba dhe kamatvonesa, por edhe me masa shtrënguese, të cilat vështirësojnë zhvillimin e aktivitetit tuaj ekonomik,” paralajmëron Administrata Tatimore.
Maji ishte muaji kur Shqipëria shkoi në zgjedhjet e përgjithshme parlamentare, një periudhë kjo, e cila shpesh është shoqëruar me shthurjen e shtetit dhe institucioneve.
Teksa e gjithë administrata ishte e përfshirë në fushatë, me drejtorët e rëndësishëm të shtetit të shpërndarë në territor për të mbledhur vota për qeverinë, duket se institucionet kanë harruar të bëjnë punën e tyre.
Përtej kësaj, përpara zgjedhjeve qeveria premtoi një aministi të gjerë nën nocionin e Paqes Fiskale. Këto premtime me sa duket kanë inkurajuar bizneset që të lënë pas dore detyrimet tatimore.
“Administrata Tatimore informon se deri në hyrjen në fuqi të ligjit për faljen e detyrimeve tatimore, si pjesë e paketës së paqes fiskale, tatimpaguesit janë të detyruar të shlyejnë detyrimet tatimore për të shmangur masat shtrënguese,” përfundon njoftimi i Tatimeve. /kapitali
