Largimi i Elisa Spiropalit nga posti i saj ka ndezur një tjetër debat politik brenda Partisë Socialiste, ndërsa analistë dhe komentues po përpiqen të kuptojnë arsyet reale të kësaj lëvizjeje.
Gazetari Mentor Kikia thotë se interpretimi se Spiropali u shkarkua për shkak të përplasjes me zëvendëskryeministren Belinda Balluku nuk qëndron domosdoshmërisht.
Në emisionin “Kjo Javë” në News24, Kikia e cilësoi situatën si një episod të ri të tensioneve të brendshme në Partinë Socialiste, duke sugjeruar se prapa kësaj historie mund të fshihen interesa më të mëdha politike.
Sipas tij, Elisa Spiropali ka qenë një nga figurat politike të rritura dhe promovuara drejtpërdrejt nga kryeministri Edi Rama gjatë viteve të fundit.
Ai kujtoi se karriera e saj politike është ndërtuar pothuajse tërësisht nën mbështetjen e Ramës, duke nisur nga drejtimi i Doganave, më pas si ministre dhe më vonë si kryetare e Kuvendit.
Kikia theksoi se çarja mes Ramës dhe Spiropalit mund të lidhet me një çështje më të ndërlikuar që, sipas tij, ka përfshirë edhe ndikime të jashtme diplomatike.
Ai përmendi pretendimin se Spiropali mund të ketë pasur rol në shtyrjen përpara të një çështjeje që lidhet me një interes të ndjekur nga ambasada gjermane dhe që, sipas tij, ka ndikuar edhe në zhvillime që lidhen me SPAK.
Analisti vuri në dukje edhe një episod nga mbledhja e fundit e grupit parlamentar socialist, ku kryeministri Rama foli për “socialistë anglishtfolës që shkojnë e raportojnë në ambasada”.
Sipas Kikisë, reagimi publik i Spiropalit duke thënë se mund të dijë edhe gjuhë të tjera, madje edhe gjermanisht, ishte një mënyrë për të marrë mbi vete këtë insinuatë dhe për të sqaruar pozicionin e saj.
Në këtë kontekst, Kikia argumenton se marrëdhënia e tensionuar mes Ramës dhe Spiropalit nuk lidhet vetëm me rivalitete të brendshme në qeveri apo me raportet me Ballukun, por mund të ketë të bëjë me një çështje më të gjerë politike që prek interesa përtej rivaliteteve të zakonshme brenda Partisë Socialiste. /skyweb.al
