Drejtori i Përgjithshëm i Doganave, Besmir Beja, zhvilloi një inspektim në Degën Doganore Qafë Thanë për të ndjekur nga afër situatën në këtë pikë kufitare, pas vështirësive të krijuara nga bllokimi i qarkullimit në aksin rrugor Tiranë–Librazhd.
Bllokimi i këtij segmenti për disa ditë ndikoi në lëvizjen e mjeteve të transportit, veçanërisht të kamionëve, duke krijuar vonesa në qarkullimin e mallrave dhe në aktivitetin e pikës doganore.
Gjatë vizitës në terren, Beja u njoh me situatën aktuale dhe masat e marra për menaxhimin e fluksit të mjeteve, ndërsa me rifillimin e qarkullimit të rregullt në rrugë aktiviteti në pikën doganore po rikthehet gradualisht në normalitet.
“Pas situatës së krijuar nga bllokimi i rrugës dhe vështirësive që pati qarkullimi i mjeteve të transportit, veçanërisht i kamionëve, puna në pikën doganore Qafë Thanë po rikthehet gradualisht në normalitet. Strukturat tona në terren kanë menaxhuar fluksin dhe vijojnë të garantojnë funksionimin e rregullt të procedurave doganore”, deklaroi Beja gjatë inspektimit.
Në kuadër të vizitës, drejtori i përgjithshëm zhvilloi edhe takime me drejtuesit dhe punonjësit e degës doganore, ku u diskutua mbi funksionimin e procedurave, menaxhimin e fluksit të mjeteve dhe rëndësinë e ruajtjes së standardeve të kontrollit dhe shërbimit.
Në Degën Doganore Qafë Thanë u zhvillua gjithashtu një takim sensibilizues me stafin e Drejtorisë së Përgjithshme të Doganave, pjesë e një fushate informuese që po zhvillohet në të gjitha degët doganore në vend.
Aktiviteti lidhet edhe me vizitën e monitorimit nga DG TAXUD, Drejtoria e Përgjithshme për Tatimet dhe Bashkimin Doganor në Komisionin Evropian, dhe synon rritjen e ndërgjegjësimit të administratës doganore shqiptare mbi standardet dhe kërkesat që lidhen me procesin e integrimit të Shqipërisë në Bashkimin Evropian.
Gjatë takimit u prezantuan gjithashtu prioritetet që lidhen me përafrimin e legjislacionit dhe praktikave doganore shqiptare me acquis të Bashkimit Evropian dhe roli që administrata doganore ka në këtë proces. /skyweb.al
