Serbia po shqyrton uljen e akcizës së karburantit për të frenuar rritjen e çmimeve në tregun e brendshëm, në një kohë kur tensionet në Lindjen e Mesme po shkaktojnë luhatje të forta në tregjet ndërkombëtare të energjisë.
Presidenti serb Aleksandar Vuçiç deklaroi se qeveria po planifikon të ulë akcizën e karburantit deri në 20%, si një masë për të mbrojtur qytetarët nga rritja e inflacionit dhe nga shtrenjtimi i menjëhershëm i karburanteve.
Sipas tij, për të realizuar një ulje më të madhe të akcizës do të nevojiten edhe ndryshime në legjislacionin përkatës.
Aktualisht, akciza për benzinën me plumb në Serbi është 76.55 dinarë për litër, për benzinën pa plumb 72 dinarë për litër dhe për naftën 74.04 dinarë për litër, sipas të dhënave të Ministrisë së Financave.
Përveç kësaj, autoritetet kanë vendosur të kufizojnë përkohësisht rritjen e çmimeve me pakicë të karburantit në një maksimum prej 3 dinarësh për litër, për benzinën dhe naftën, deri më 13 mars.
Ministria e Tregtisë njoftoi se për periudhën 6-13 mars çmimi maksimal me pakicë për naftën është vendosur në 203 dinarë për litër, ndërsa për benzinën në 184 dinarë për litër.
Ministrja e Energjisë Dubravka Djedovic Handanovic deklaroi se, duke marrë parasysh zhvillimet në tregjet globale, çmimi real i naftës do të duhej të ishte rreth 224 dinarë për litër, ndërsa për benzinën rreth 191 dinarë.
Sipas saj, qeveria po monitoron nga afër situatën në tregjet ndërkombëtare të energjisë dhe në ditët në vijim pritet të dalë me masa të tjera konkrete për të mbrojtur qytetarët dhe ekonominë nga pasojat e krizës energjetike.
