Inflacioni në Shqipëri shënoi një rritje të re në muajin shkurt, ndërsa qiratë dhe kostot e energjisë po kthehen gjithnjë e më shumë në një barrë të rëndë për familjet shqiptare.
Sipas të dhënave të publikuara nga INSTAT, norma vjetore e inflacionit e matur me Indeksin e Çmimeve të Konsumit arriti në 2.5 për qind në shkurt 2026, nga 1.9 për qind që ishte në të njëjtën periudhë të një viti më parë. Krahasuar me muajin janar të këtij viti, çmimet e konsumit u rritën me 0.5 për qind.
Analiza e strukturës së inflacionit tregon se rritja e çmimeve po drejtohet kryesisht nga kostot e strehimit dhe energjisë. Grupi “Qira, ujë, energji elektrike, gaz dhe karburante të tjera” shënoi rritjen më të fortë vjetore me 5.3 për qind dhe pati edhe ndikimin më të madh në inflacionin total.
Vetëm ky grup kontribuoi me rreth 1.06 pikë përqindje në rritjen e përgjithshme të çmimeve, duke e bërë atë faktorin kryesor që po shtyn inflacionin në rritje.
Pas tij renditen ushqimet dhe pijet joalkoolike, të cilat kontribuan me 0.60 pikë përqindje në inflacionin vjetor. Ndikim në rritjen e çmimeve patën gjithashtu edhe mobiljet dhe pajisjet e shtëpisë, restorantet dhe shërbimet e akomodimit, si dhe pijet alkoolike dhe duhani.
Në krahasim me muajin janar, rritja më e madhe mujore e çmimeve u regjistrua tek ushqimet dhe pijet joalkoolike me 0.9 për qind, ndërsa grupi i qirave dhe energjisë u rrit me 0.6 për qind.
Të dhënat tregojnë se presioni mbi buxhetet familjare po zhvendoset gjithnjë e më shumë tek kostot bazë të jetesës, sidomos tek strehimi dhe energjia, të cilat zënë një pjesë të konsiderueshme të shpenzimeve mujore të familjeve.
Në këtë kontekst, rritja e qirave po shihet gjithnjë e më shumë si një nga faktorët që rëndon mbi familjet shqiptare, duke u shtuar kostove të tjera të domosdoshme si energjia elektrike dhe ushqimet. /skyweb.al
