Pagat në Shqipëri kanë vijuar të rriten gjatë vitit 2025, duke e çuar nivelin mesatar të të ardhurave mujore në gati 84 mijë lekë. Të dhënat zyrtare tregojnë se paga mesatare është rritur nga rreth 77.4 mijë lekë që ishte një vit më parë.
Në krahasim me vitin 2024, pagat u rritën me 8.4%. Megjithatë, ritmi i rritjes është disi më i ngadaltë se një vit më parë, kur pagat kishin shënuar një rritje rreth 10%.
Vetëm në tremujorin e fundit të vitit 2025, paga mesatare mujore bruto për një të punësuar me pagë arriti në 86.984 lekë. Ky nivel është rreth 4.3% më i lartë se në të njëjtën periudhë të vitit 2024 dhe rreth 4.4% më i lartë se në tremujorin e tretë të vitit 2025.
Sektorët që paguajnë më shumë në ekonomi mbeten financat dhe teknologjia. Aktivitetet financiare dhe të sigurimit regjistruan pagën mesatare më të lartë në ekonomi, me rreth 173 mijë lekë në muaj.
Pas tyre renditet sektori i informacionit dhe komunikacionit me rreth 131 mijë lekë.
Rritja më e madhe e pagave gjatë vitit u regjistrua pikërisht në sektorin e informacionit dhe komunikacionit, ku pagat u rritën me rreth 7.9%. Në krahun tjetër, rritja më e ulët u shënua në aktivitetet e lidhura me artin, argëtimin dhe shërbimet e tjera, ku pagat u rritën vetëm me rreth 2.2%.
Edhe në nivel profesionesh, diferencat mbeten të dukshme. Pagat më të larta vazhdojnë të përqendrohen tek menaxherët, drejtuesit dhe funksionet ekzekutive, ku paga mesatare arrin rreth 135 mijë lekë. Specialistët me arsim të lartë renditen menjëherë pas tyre me rreth 115 mijë lekë në muaj.
Rritja më e fortë e pagave sipas profesioneve u regjistrua tek Forcat e Armatosura, me një rritje rreth 10.6%, ndërsa nëpunësit shënuan një rritje prej rreth 6.2%. Në anën tjetër, drejtuesit e lartë dhe menaxherët patën rritjen më të ulët të pagave, rreth 3.3%.
Të dhënat tregojnë gjithashtu një zhvendosje të shpërndarjes së të punësuarve drejt pagave më të larta. Në fund të vitit 2025, pjesa e të punësuarve që marrin mbi 120 mijë lekë në muaj u rrit në 16.2%, nga 14.1% një vit më parë. Edhe grupi i pagave nga 95 mijë deri në 120 mijë lekë u rrit lehtë.
Ndërkohë, numri i të punësuarve që paguhen deri në nivelin e pagës minimale ka rënë, nga 14.2% në 12.8%. Krahasuar me tremujorin e tretë të vitit, rritja më e dukshme është përsëri tek grupi i pagave mbi 120 mijë lekë.
Në tërësi, struktura e pagave në fund të vitit 2025 tregon një tendencë të lehtë drejt niveleve më të larta të të ardhurave në tregun e punës. /skyweb.al
