Qeveria propozon një trajtim të ri për konfliktet e vjetra ndërmjet titujve privatë dhe pronave që pretendohen nga shteti.
Ndryshimet ndodhen në dy projektligje të hedhura për konsultim publik: Ndryshimet në ligjin nr. 20/2020 “Për përfundimin e proceseve kalimtare të pronësisë” dhe projektligjin e ri “Për pronat e paluajtshme të shtetit në Republikën e Shqipërisë”.
Ndryshimi i parë parashikon që institucionet shtetërore të tërhiqen nga disa padi të ngritura për anulimin e titujve privatë dhe njohjen e pasurisë si pronë shtetërore.
Bëhet fjalë për tituj të nxjerrë me parregullsi në formë, procedurë ose përmbajtje, por vetëm kur prona u është kaluar personave të tretë ose është zhvilluar sipas legjislacionit të territorit.
Tërheqja do të zbatohet për proceset gjyqësore që nuk kanë përfunduar me vendim të formës së prerë.
Kjo do të thotë se disa tituj të kontestuar nga shteti mund të mbeten në fuqi për shkak se prona është shitur ose mbi të është ndërtuar ndërkohë.
Ndërsa për titujt e paregjistruar, qeveria vendos një procedurë tjetër.
Personat që disponojnë tituj administrativë mbi prona që figurojnë shtetërore, por që nuk janë pasqyruar në Hipotekë ose Kadastër, duhet të kërkojnë regjistrimin brenda 12 muajve nga hyrja në fuqi e ligjit.
Nëse aplikojnë brenda këtij afati, përjashtohen nga kamatëvonesat. Pas 12 muajve mund ta paraqesin përsëri titullin, por do të paguajnë të gjithë kamatëvonesën e krijuar.
Kur Kadastra refuzon regjistrimin, në kartelën e pasurisë shënohet pretendimi privat. Refuzimi nuk e anulon titullin dhe qytetari mund ta kërkojë njohjen e pronësisë në gjykatë.
Nëse titulli prek një pronë publike të patjetërsueshme, Agjencia Shtetërore e Pronës njofton Avokaturën e Shtetit për të kërkuar në gjykatë shpalljen e pavlefshmërisë së tij.
Dy projektligjet synojnë kështu të mbyllin një pjesë të konflikteve të trashëguara: shteti tërhiqet nga disa gjyqe, ndërsa mbajtësve të titujve të paregjistruar u vendoset një afat për t’i paraqitur ato. /skyweb.al
