Qeveria propozon ndryshimin e procedurave për kalimin pa pagesë në pronësi të tokave bujqësore të ish-kooperativave dhe ish-ndërmarrjeve bujqësore.
Ndryshimet janë përfshirë në projektligjin që ndërhyn në ligjin nr. 20/2020 “Për përfundimin e proceseve kalimtare të pronësisë”, të hedhur për konsultim publik.
Kadastra do të përcaktojë sipërfaqen që mund të kalojë në pronësi, do të verifikojë kushtet në terren dhe do të hartojë listën e përdoruesve faktikë për çdo ish-kooperativë ose ish-ndërmarrje. Lista do t’i dërgohet këshillit bashkiak për miratim.
Kur kërkuesi nuk paraqitet për matjen e sipërfaqes ose nuk bashkëpunon me administratën, ASHK-ja duhet të bëjë njoftim publik brenda 10 ditëve.
Njoftimi do të publikohet në njësinë administrative ku ndodhet toka, në drejtorinë vendore të Kadastrës dhe në faqen zyrtare të institucionit.
Qytetari do të ketë 30 ditë për t’u paraqitur dhe për të plotësuar detyrimet e kërkuara. Nëse nuk reagon, procedura pezullohet për 60 ditë të tjera.
Nëse edhe pas këtij afati kërkuesi vazhdon të mos paraqitet ose të mos bashkëpunojë, Kadastra refuzon kërkesën për kalimin falas të tokës në pronësi.
Nëse qytetari paraqitet përpara mbylljes së procedurës, ASHK-ja vijon shqyrtimin e dosjes.
Ndryshimi nuk prek pronarët që e kanë tokën të regjistruar. Ai zbatohet për përdoruesit faktikë që kërkojnë ta marrin tokën bujqësore në pronësi pa pagesë.
