Në trotuarin pranë Muzeut Arkeologjik në qytetin e Durrësit, një grup turistësh tërheqin zvarrë valixhet dhe komunikojnë në telefon për të saktësuar adresat ku do të qëndrojnë.
Kjo është një pamje e zakonshme e ditëve të shtatorit në Durrës, qytetit që vazhdon të jetë mikpritësi më i madh veror i turistëve në shkallë vendi.
“Kur mendon se 40 vjet më parë kjo lagje thuajse nuk ekzistonte, habitesh,” thotë për BIRN Xhevdet Kalaja, 75 vjeç, ndërsa tregon lagjen pranë portit detar që filloi të ndërtohej në vitin 1987.
“Edhe aty ku ndodhej një fushë futbolli me rërë të ngjeshur në breg të detit, gjatë këtyre viteve janë ngritur pallate pa fund,” shtoi ai.
Ndërtimet e shumta në lagjen nr.1 të Durrësit po shërbejnë gjatë viteve të fundit si shtëpi pritjeje për një numër në rritje të turistëve vendas dhe të huaj. Çmimet në këtë zonë janë rritur me 40-50 për qind, çka i ka detyruar shumicën e pensionistëve italianë që të zhvendosen drejt zonës së plazhit në jug të qytetit.
“Një pjesë e madhe e turistëve kanë shfrytëzuar “Bed & Breakfast, apartamentet e banorëve, të cilat tashmë nuk jepen me qira mujore, por vetëm për pak ditë ç‘ka e ka rritur fitimin e tyre,” thotë Remzi Taka, një nga administratorët e pallateve të lagjes.
Sipas tij, në çdo pallat ka tashmë apartamente që jepen me qira ditore për pushuesit, ndërkohë që të tjerë banorë po i adaptojnë shtëpitë e tyre për të njëjtin qëllim.
“Kemi patur punë më shumë se sa çdo vit tjetër,” thotë Margarita Roçi, e cila punon prej vitesh në një furrë buke. Në dyqan hyn një grua e huaj me rroba banje për të blerë bukë. “Jemi bërë si në Florida,” thotë me humor Margarita.
Pak metra më tutje, turistët mbajnë radhën përpara dyqaneve për të blerë zarzavate dhe fruta. Por jo të gjithë e miratojnë këtë lloj pushimi turistik.
Shumica e restoranteve të bregdetit këtë verë kanë më pak klientë dhe kjo lidhet me shtimin e apartamenteve të lëshuara me qira.
“Turistët e apartamenteve shpenzojnë pak. Ata shfrytëzojnë supermerkatot dhe dyqanet e shumicës, duke iu larguar restoranteve,” thotë Edmond Resnjaku që menaxhon një nga restorantet e shëtitores.
Resnjaku thotë se pavarësisht numrit të turistëve, klientela në restorantin e tij ka rënë me 15%. Ai e lidh këtë edhe me zhvlerësimin e shpejtë të euros dhe dollarit në Shqipëri.
Eduart Xhepa, drejtues i shoqatës lokale të turizmit dhe menaxher i njërit prej hoteleve të njohura në lagjen nr. 1 të Durrësit thotë se sezoni turistik i këtij viti pritet të vazhdojë deri në mesin e muajit tetor.
Por Xhepa është i ndërgjegjshëm se rritja e numrit të turistëve nuk përkthehet domosdoshmërisht në më shumë biznes.
“Ne kemi hequr dorë nga numërimi i turistëve,” tha Xhepa për BIRN, duke shtuar se synimi është rritja e cilësisë së shërbimit.
Kreu i shoqatës lokale të turizmit i gëzohet pranisë së turistëve nga Franca dhe Anglia, të cilët kanë munguar gjatë viteve të kaluara. Ndërkaq, vazhdojnë të zgjedhin Durrësin edhe turistët nga Austria, Polonia, Gjermania, Zvicra, Italia, etj. pa harruar vendasit dhe shqiptarët e diasporës.
Lagjia 1 bashkë me Muzeun Arkeologjik ka në territorin e saj edhe Amfiteatrin antik dhe Torrën Veneciane, dy nga monumentet më të vizituar të qytetit bregdetar.
“Tani vijnë turistë plot, por 50-60 vjet përpara kur vendi ishte vetizoluar ishin krejtësisht të shkretë,” përfundon Xhevdet Kalaja. /BIRN
*Titulli është i redaksisë
