Ashensorët që përdoren çdo ditë në pallate banimi dhe ambiente pune vijojnë të përbëjnë rrezik serioz për qytetarët, kur nuk janë të regjistruar, nuk mirëmbahen dhe nuk kontrollohen sipas ligjit.
Për këtë arsye, Inspektorati Shtetëror i Mbikëqyrjes së Tregut ka bërë një apel publik, duke theksuar se siguria e ashensorëve nuk është zgjedhje, por detyrim ligjor.
Sipas institucionit, ligji përcakton qartë përgjegjësitë e administratorëve dhe shoqërive administruese.
Ata janë të detyruar të regjistrojnë çdo ashensor, të lidhin kontrata mirëmbajtjeje me subjekte të licencuara dhe të sigurojnë kryerjen e inspektimeve teknike periodike.
Për ashensorët në pallate banimi, kontrolli teknik duhet të kryhet të paktën një herë në vit.
Në ambientet e punës, inspektimet janë më të shpeshta për shkak të përdorimit intensiv. Përdorimi i ashensorëve pa këto kontrolle dhe pa dokumentacionin përkatës konsiderohet i paligjshëm dhe i rrezikshëm.
ISHMT nënvizon se mungesa e mirëmbajtjes dhe e inspektimeve rrit ndjeshëm mundësinë e defekteve teknike dhe aksidenteve, duke vënë në rrezik jetën e përdoruesve.
Në rast shkeljesh, inspektorati ushtron kontrolle në terren dhe mund të vendosë masa administrative, deri në ndalimin e përdorimit të ashensorit kur konstatohet rrezik serioz.
Apeli vjen në një kohë kur shumë ashensorë në vend janë të vjetër ose nuk administrohen sipas ligjit.
Institucioni u bën thirrje administratorëve dhe bashkëpronarëve të marrin përgjegjësinë që u takon, duke respektuar detyrimet ligjore, pasi siguria e ashensorëve lidhet drejtpërdrejt me mbrojtjen e jetës dhe shëndetit të qytetarëve. /skyweb.al
