Rritja e çmimeve të karburanteve ka marrë një tjetër hov në Shqipëri, duke e çuar naftën pranë nivelit 200 lekë për litër. Në shumë pika karburanti në vend, një litër naftë po shitet aktualisht nga 198 lekë, rreth 16 lekë më shumë krahasuar me një ditë më parë, kur çmimi ishte 182 lekë për litër.
Në disa pika të tjera çmimi është edhe më i lartë, ndërsa rritje e ndjeshme është reflektuar edhe tek benzina.
Valë shtrenjtimi për hidrokarburet në tregun vendas nisi pas përshkallëzimit të tensioneve në Lindjen e Mesme. Ndikimi më i fortë në tregjet ndërkombëtare erdhi pasi Irani vendosi të mbyllë ngushticën e Hormuzit, një nga rrugët kryesore të transportit të naftës në botë, nga ku kalon rreth një e pesta e furnizimit global.
Sipas përfaqësuesve të Shoqatës së Hidrokarbureve, të cilët një javë më parë paralajmëruan për një rritje të mundshme të çmimeve, nafta në Shqipëri mund të shtrenjtohej deri në 30 ose 40 lekë për litër nëse tensionet do të vazhdonin. Ata theksuan se çmimet mund të mbeten të paqëndrueshme dhe të lidhura ngushtë me zhvillimet e konfliktit në rajon.
Nga fillimi i këtij muaji deri më tani, çmimi i naftës në tregun vendas është rritur mesatarisht me rreth 27 lekë për litër.
Përballë këtyre luhatjeve, Autoriteti i Konkurrencës ka nisur që nga 4 marsi një proces monitorimi në tregun e hidrokarbureve, duke kontrolluar pikat e tregtimit me shumicë dhe pakicë për të parë nëse rritjet e çmimeve janë në përputhje me lëvizjet në bursat ndërkombëtare.
Ndërkohë, rritje të çmimeve janë shënuar edhe në vendet e rajonit, por në nivele më të përmbajtura se në Shqipëri. Në Kosovë një litër naftë po shitet deri në 1.6 euro, rreth 35 cent më shumë se një ditë më parë. Në Mal të Zi çmimi ka arritur rreth 1.47 euro për litër, ndërsa në Maqedoninë e Veriut qytetarët po e blejnë naftën rreth 1.25 euro për litër, afërsisht 15 cent më shumë se më parë.
