Autoriteti Kombëtar i Ushqimit ka bllokuar 24 tonë misër blektoral në qarkun Shkodër, pasi analizat kanë zbuluar praninë e aflatoksinës B1 mbi normën e lejuar.
Sasia e kontaminuar i përkiste subjektit “Modi” shpk, ndaj të cilit është bërë kallëzim penal për mashtrim me produktet ushqimore.
Sipas njoftimit zyrtar, kontrollet e kryera gjatë muajit mars 2026 kanë zbuluar shkelje të rënda nga ana e operatorit të biznesit.
Autoriteti i Ushqimit thotë se subjekti ka vepruar në kundërshtim me ligjin duke prishur me dashje shenjat e sigurisë të vendosura nga inspektorët dhe duke lëvizur sasinë e bllokuar pa dokumentacion gjurmueshmërie.
AKU thekson se këto veprime përbëjnë shkelje serioze, pasi përfshijnë prishje të qëllimshme të shiritave të bllokimit, tentativë për vendosjen në qarkullim të ushqimeve të rrezikshme dhe mashtrim me produktet ushqimore.
Për këtë rast janë vendosur katër masa administrative me gjobë ndaj subjektit, ndërsa çështja i është referuar organeve të drejtësisë për ndjekje penale.
Ndërkohë, Autoriteti Kombëtar i Ushqimit ka nisur edhe procedime disiplinore ndaj inspektorëve të Drejtorisë Rajonale të AKU-së në Shkodër për lëshime në detyrë, duke theksuar se integriteti i procesit të inspektimit dhe siguria ushqimore nuk janë të negociueshme. /skyweb.al
