Presidenti i Republikës, Bajram Begaj, ka uruar besimtarët bektashinj me rastin e festës së Sulltan Novruzit, e cila shënon fillimin e vitit të ri sipas këtij besimi dhe përkon me ditëlindjen e Imam Aliut.
Me këtë rast, Kreu i Shtetit zhvilloi një vizitë në Selinë e Shenjtë të Kryegjyshatës Botërore Bektashiane, ku u prit nga Kryegjyshi Botëror, Haxhi Dede Baba Edmond Brahimaj, të cilit i përcolli urimet për këtë ditë të shënuar.
Në mesazhin e tij, Presidenti theksoi rëndësinë e kësaj feste si një moment reflektimi dhe bashkimi për shoqërinë shqiptare, duke e cilësuar Sulltan Novruzin si simbol të lindjes së shpresës dhe dritës.
Ai uroi që kjo ditë të shërbejë për më shumë paqe, begati dhe mirëkuptim mes qytetarëve, duke theksuar se vlerat që përfaqëson kjo festë duhet të shoqërojnë jetën e përditshme.
Begaj nënvizoi se mesazhet e dashurisë, solidaritetit dhe besimit për një të ardhme më të mirë janë thelbësore për të ndërtuar një shoqëri më të drejtë dhe më të bashkuar.
“Sulltan Novruzi është lindja e pranverës, e shpresës dhe e dritës mbi errësirën”, u shpreh Presidenti gjatë vizitës në Kryegjyshatë. /skyweb.al
