Sipas VKM-së së re, bizneset gastronomike mund të përdorin deri në 25% të gjerësisë së trotuarit, por marrja e lejes do të lidhet drejtpërdrejt me përmbushjen e këtij detyrimi mjedisor.
Leja konsiderohet e vlefshme vetëm pasi subjekti të ketë dokumentuar zyrtarisht mbjelljen e pemëve dhe të ketë përmbushur detyrimet financiare përkatëse.
Ky ndryshim vendos një lidhje të drejtpërdrejtë mes zgjerimit të aktivitetit të biznesit dhe kompensimit mjedisor, duke synuar të balancojë zënien e hapësirës publike me rritjen e gjelbërimit urban.
Detyrimi do të aplikohet jo vetëm për bare dhe restorante, por edhe për kioskat që vendosin karrige në hapësirat publike.
Rregullorja e re përcakton gjithashtu një kuadër të detajuar për mënyrën e përdorimit të hapësirave publike, duke përfshirë kufizime të forta për vendosjen e strukturave, ndalimin e barrierave fizike dhe detyrimin për të garantuar lëvizjen e lirë të qytetarëve.
Në të njëjtën kohë, vendosen masa ndëshkuese të ashpra për shkeljet, që nisin nga paralajmërimi dhe shkojnë deri në gjoba minimale prej 35 mijë lekësh për metër katror dhe pezullim të aktivitetit.
Lejet për shfrytëzimin e hapësirës publike do të jepen për një afat dyvjeçar dhe aplikimet do të kryhen përmes platformës e-Albania.
Ndërkohë, për aktivitete të përkohshme, si eventet apo festat, lejet do të kenë një afat maksimal prej 30 ditësh.
Vendosja e këtij detyrimi vjen në vijim të aksionit të ndërmarrë në mbarë vendin për lirimin e hapësirave publike dhe rregullimin e përdorimit të tyre, duke sinjalizuar një qasje më të ashpër ndaj bizneseve që zënë trotuaret, por njëkohësisht edhe një përpjekje për të shtuar sipërfaqet e gjelbra në qytete. /skyweb.al
