Publikimi i të dhënave mbi pagesat dhe transaksionet e Thesarit është ndërprerë që prej datës 26 shkurt në faqet zyrtare të shtetit shqiptar, duke ngritur shqetësime serioze për transparencën e financave publike. Alarmi është ngritur nga Open Data Albania, e cila evidenton mungesën e aksesit në një nga instrumentet kryesore të monitorimit të shpenzimeve publike.
Sipas informacionit të publikuar, ndërprerja nuk lidhet me ndonjë vendim apo ndryshim të shpallur zyrtarisht në politikat e publikimit të të dhënave. Burimet e disponueshme e lidhin situatën me ndryshimet e shumta në stafin e teknologjisë së informacionit në Agjencinë Kombëtare të Shoqërisë së Informacionit.
Stafi i ri, sipas të dhënave, nuk ka marrë ende plotësisht në dorë funksionet që lidhen me mirëmbajtjen e sistemit, ndërsa ekziston rreziku që kjo situatë të zgjasë në kohë. Kjo krijon një precedent ku institucionet nuk përmbushin një nga detyrimet bazë, atë të garantimit të transparencës publike.
Sistemi i publikimit të të dhënave të Thesarit ka funksionuar për vite si një mekanizëm i konsoliduar, që u mundësonte qytetarëve dhe organizatave të interesuara të ndjekin në mënyrë të vazhdueshme përdorimin e fondeve publike, institucionet që kryejnë pagesa dhe përfituesit e tyre.
Me ndërprerjen e këtij publikimi, publiku mbetet pa informacion mbi mënyrën se si po shpenzohen fondet, kush përfiton prej tyre dhe nëse këto pagesa kryhen në përputhje me parimet e transparencës dhe llogaridhënies.
Në këto kushte, rritet edhe rreziku që përfitues të caktuar të shmangin kontrollin publik, në një moment kur mungon një sistem i hapur dhe i aksesueshëm për verifikimin e shpenzimeve.
Ndërprerja e transparencës në një sistem të institucionalizuar ngre pikëpyetje të forta mbi funksionimin e administratës dhe menaxhimin e financave publike, duke lënë të hapur diskutimin nëse bëhet fjalë për paaftësi administrative apo për një ndërprerje të qëllimshme të aksesit në të dhëna. /skyweb.al
