Deputetja socialiste Elisa Spiropali ka reaguar publikisht një ditë pas përplasjes së fortë me kryeministrin Edi Rama dhe ministren Erjona Ismaili në mbledhjen e grupit parlamentar të Partia Socialiste.
Përmes një postimi në rrjetet sociale, Spiropali publikoi një mesazh të shkurtër: “Të dielë të bukur. Mbaje fytyrën nga drita dhe hijet mbeten pas”, duke u interpretuar si një përgjigje indirekte ndaj tensioneve të një dite më parë.
Mbledhja e grupit parlamentar me ministrat u shoqërua me debate të forta. Episodi i parë u regjistrua gjatë një diskutimi mes drejtoreshës së Kadastrës, Lorena Goxhobelli dhe deputetes Zamira Sinaj, ku ndërhyrja e Spiropalit për respekt ndaj deputetëve solli reagimin e menjëhershëm të Ramës. Kryeministri iu drejtua ashpër deputetes duke i kërkuar të mos fliste në praninë e tij.
Përplasja u përshkallëzua më tej gjatë raportimit të ministres Ismaili për strategjinë e komunikimit. Mimikat dhe reagimet e Spiropalit shkaktuan ndërhyrjen e ministres, çka solli një tjetër reagim të fortë nga ana e Ramës, i cili paralajmëroi se mund ta nxirrte jashtë mbledhjes nëse vijonte ndërhyrjet.
Spiropali, nga ana tjetër, kërkoi që ministrja t’i kërkonte falje për mënyrën e komunikimit, duke iu përgjigjur kryeministrit se ishte e gatshme t’i dëgjonte kritikat edhe publikisht.
Në sallë mbizotëroi heshtja, ndërsa situata u qetësua vetëm pas një ndërhyrjeje nga deputeti Erjon Braçe.
Ngjarja vjen në një moment tensionesh brenda grupit socialist. Spiropali kishte munguar më herët në seancën parlamentare ku u votua imuniteti i Belinda Balluku, ndërsa më pas pati edhe një përplasje në distancë me drejtuesin e grupit parlamentar, Taulant Balla.
Përplasja e fundit në mbledhjen e grupit mbetet një episod i hapur, ndërsa mbetet për t’u parë nëse tensionet do të thellohen më tej brenda Partisë Socialiste. /skyweb.al
