SPAK, përmes Byrosë Kombëtare të Hetimit, ka kryer kontrolle në kompleksin Green Coast në jug të vendit, në kuadër të hetimeve për dosjen e tenderëve të AKSHI-t.
Sipas burimeve, kontrollet janë zhvilluar në dy vila në pronësi të Ergys Agasit dhe në një vilë të Ermal Beqirit, me vendim të Gjykatës së Posaçme kundër Korrupsionit dhe Krimit të Organizuar.
Aksioni ka pasur si qëllim mbledhjen e provave të tjera që lidhen me aktivitetin e dy personave në raport me procedurat e dyshuara të manipulimit të tenderëve në AKSHI, si dhe me dyshimet për ushtrimin e presionit ndaj operatorëve të tjerë ekonomikë.
Hetimet përfshijnë edhe episode të rënda, mes tyre edhe rastin e pretenduar të pengmarrjes së biznesmenit Gerind Meçe, i cili dyshohet se është detyruar të tërhiqet nga garat për tenderë publikë.
Gjatë kontrolleve, agjentët e BKH kanë sekuestruar materiale dhe pajisje që konsiderohen me interes për hetimin, ndërsa çështja vijon të mbetet në zhvillim.
Burime bëjnë me dije se në kuadër të kësaj dosjeje janë marrë në pyetje edhe persona të tjerë, përfshirë individë të paidentifikuar publikisht, të cilët kanë dhënë deklarime para hetuesve, duke kontribuar në zbardhjen e mekanizmave të dyshuar të funksionimit të skemës. /skyweb.al
