Sot në fokus janë dy tenderët për aktivitetet gjatë ceremonisë së çeljes së sezonit turistik, të cilat janë shpallur si dy procedura të ndara, por që lidhen drejtpërdrejt me të njëjtin aktivitet.
Tenderi i parë është ai me objekt “Organizim aktiviteti për çeljen e sezonit turistik 2026”, me një fond limit prej rreth 3.3 milionë lekësh pa TVSH.
Ndërkohë, tenderi i dytë është ai me objekt “Shërbime mbështetëse për aktivitetin e çeljes së sezonit veror 2026”, me një fond limit prej 6.8 milionë lekësh pa TVSH.
Në total, për një event disa ditor, Bashkia Himarë parashikon të shpenzojë mbi 10.2 milionë lekë, ose mbi 100 mijë euro nga taksat e qytetarëve.
Nga analiza që Skyweb.al i ka bërë dokumenteve dhe ankimimit të depozituar në KPP nga një operator ekonomik, rezulton se edhe pse bëhet fjalë për dy tendera formalish të ndryshëm, kriteret teknike janë thuajse identike, ndërsa termat e referencës mbivendosen në mënyrë të plotë.
Kjo situatë ngre dyshime të forta se kemi të bëjmë me paracaktim të fituesve dhe një ndarje artificiale të një procedure të vetme, me qëllim kontrollin e garës.
Në të dyja procedurat kërkohen të njëjtat pajisje, i njëjti staf dhe të njëjtat kapacitete, ndërkohë që në praktikë ato i shërbejnë të njëjtit event.
Në vend që të kemi një tender të vetëm, kemi dy të tillë, të ndarë në mënyrë të dyshimtë.
Por kjo nuk është e vetmja problematikë.
Dokumentet tregojnë se kriteret teknike janë shpesh të paqarta dhe evazive. Për shumë nga aktivitetet e parashikuara, si koncertet, panairet, garat sportive apo aktivitetet për fëmijë, mungojnë të dhëna bazë si numri i pjesëmarrësve, kohëzgjatja, përmasat apo volumet konkrete të shërbimeve.
Kjo krijon një situatë ku ofertuesit nuk kanë një bazë reale për të përllogaritur ofertat, ndërsa Komisioni i Vlerësimit të Ofertave nën diktimin e Vangjel Tavos fiton një hapësirë të gjerë interpretimi.
Në ankimim theksohet se mungesa e specifikimeve teknike, e sasive dhe e njësive matëse e bën të pamundur krahasimin objektiv të ofertave dhe cenon drejtpërdrejt parimin e transparencës dhe të trajtimit të barabartë.
Në të njëjtën kohë, disa kritere duken të shkëputura nga realiteti i kontratës. Në një rast kërkohet një gjenerator me kapacitet të lartë, pa asnjë shpjegim teknik apo përllogaritje të nevojës, ndërsa në raste të tjera kërkohen mjete transporti dhe staf i specializuar pa lidhje të qartë me objektin konkret të prokurimit.
Sipas kompanisë ankimuese, këto kërkesa jo vetëm që nuk janë të justifikuara, por krijojnë barriera artificiale që kufizojnë konkurrencën dhe favorizojnë operatorë të caktuar.
Një tjetër element që forcon dyshimet është precedenti i vitit të kaluar. Në çeljen e sezonit turistik 2025, një person nga Velçani i Pogradecit, me aktivitet kryesor rritjen e patateve, arriti të përfitojë kontratën me një ofertë që shkonte në 99.99% të fondit limit, një tregues klasik i mungesës së garës reale.
Dhe ndërsa sezoni turistik afrohet, mbetet për t’u parë nëse Komisioni i Prokurimit Publik do të ndërhyjë për të rivendosur garën dhe vënë Vangjel Tavon dhe tarafin e tij para përgjegjësisë, apo nëse mbi 100 mijë euro do të përfundojnë sërish tek të njëjtët përfitues, nën petkun e aktiviteteve promocionale. /skyweb.al
