Volkswagen po përballet me një nga proceset më të mëdha të ristrukturimit në historinë e kompanisë, ndërsa drejtuesit paralajmërojnë se mund të nevojiten edhe 50 mijë shkurtime të tjera të vendeve të punës.
Këto shkurtime do t’u shtoheshin rreth 50 mijë largimeve që janë miratuar më parë në të gjithë grupin. Kompania po përpiqet të ulë kostot përballë konkurrencës së fortë nga prodhuesit kinezë dhe faturës miliardëshe të tarifave amerikane.
Pesë fabrika të Volkswagen po përballen me mundësinë e mbylljes, mes tyre edhe impianti në Hanover. Kryeministri i Saksonisë së Poshtme, Olaf Lies, u kërkoi aksionerëve, drejtuesve dhe përfaqësuesve të punonjësve të gjejnë një zgjidhje të përbashkët për të mbrojtur industrinë automobilistike gjermane.
Punonjësit do të kërkojnë shpjegime nga drejtori ekzekutiv Oliver Blume gjatë një serie takimesh në fabrika. Blume argumenton se shkurtimet janë të domosdoshme për ta bërë kompaninë përsëri konkurruese.
Plani ka hasur kundërshtim nga këshilli mbikëqyrës dhe sindikatat. Kryetarja e këshillit të punonjësve, Daniela Cavallo, ka kundërshtuar mbylljen e fabrikave dhe largimet e detyruara, duke kërkuar që strategjia të mos mbështetet vetëm te ulja e kostove të punës.
Këshilli mbikëqyrës i Volkswagen pritet të zhvillojë më 4 shtator një mbledhje vendimtare për të ardhmen e planit të ristrukturimit.
