Aeroporti Ndërkombëtar i Tiranës ka regjistruar muajin më të ngarkuar në historinë e tij, duke kaluar për herë të parë shifrën e 1.1 milion pasagjerëve brenda një muaji.
Sipas të dhënave të publikuara nga TIA, gjatë prillit 2026 kanë udhëtuar përmes aeroportit 1,133,634 pasagjerë, një rritje prej 25.3% krahasuar me të njëjtën periudhë të një viti më parë. Ky rezultat e bën prillin e këtij viti muajin më të ngarkuar të regjistruar ndonjëherë nga aeroporti.
Kjo është nje4 shifër e jashtëzakonshme pasi përllogaritet që TIA të përpunojë gjatë 24 orëve mesatarisht 36 000 pasagjerë, një numër i ngjashëm me popullsinë e një qyteti mesatar në vend si Kukësi apo Laçi.
Rritja e trafikut është reflektuar edhe në numrin e lëvizjeve ajrore. Gjatë muajit prill u regjistruan 6,724 ulje dhe ngritje avionësh, ose 24.1% më shumë se në prill të vitit 2025.
Aktualisht Aeroporti i Tiranës lidh Shqipërinë me 87 destinacione në 28 shtete të ndryshme, përmes 23 kompanive ajrore. Sipas statistikave të aeroportit, Milano, Londra, Roma, Brukseli dhe Bolonja mbeten destinacionet më të kërkuara nga pasagjerët.
Prilli shënoi gjithashtu disa zhvillime të rëndësishme për rrjetin e fluturimeve. Gjatë këtij muaji, Ryanair hapi zyrtarisht bazën e saj në Tiranë me katër avionë të vendosur në aeroport, duke rritur më tej kapacitetet dhe numrin e linjave direkte.
Një tjetër zhvillim ishte nisja e bashkëpunimit me kompaninë finlandeze Finnair, e cila iu bashkua operatorëve që fluturojnë drejt dhe nga Tirana. Me hyrjen e saj në treg, Helsinki u shtua në hartën e destinacioneve direkte të aeroportit.
Rritja nuk kufizohet vetëm te muaji prill. Sipas të dhënave të aeroportit, gjatë katër muajve të parë të vitit 2026 janë shërbyer rreth 3.3 milionë pasagjerë, ose 10.3% më shumë krahasuar me të njëjtën periudhë të vitit të kaluar.
Shifrat konfirmojnë vijimin e ritmeve të larta të rritjes së trafikut ajror në Shqipëri, ndërsa Aeroporti i Tiranës po konsolidon pozicionin e tij si një nga aeroportet me rritjen më të shpejtë në rajon. /skyweb.al
