Në orët e fundit të mbarimit të mandatit 3-vjeçar të Altin Dumani në krye të Prokurorisë së Posaçme SPAK, në ambientet e kësaj prokurorie është parë të hyjë një nga personazhet më të përfolur të dosjes së AKSHI-t, Daniel Shima., i thirrur nga prokurori i çështjes, Bledar Maksuti
Shima, i cili në muajin gusht 2025 u bë i njohur për publikun pas kallëzimit për rrëmbimin e tij, rezulton të ketë qenë për një periudhë kohore zv/drejtor i Agjencisë Kombëtare të Shoqërisë së Informacionit (AKSHI), ndërsa firma e tij figuron në dhjetëra dokumente tenderash që janë sekuestruar nga SPAK.
Në rrëfimin e tij, Shima ka dhënë detaje që implikojnë drejtpërdrejt ish-drejtoreshën e AKSHI-t, Mirlinda Karçanaj, dhe biznesmenin Ermal Beqiri, duke përshkruar një skemë të orientimit dhe paracaktimit të tenderave.
“…interesi i shoqërive që futen në këto procedura prokurimi të diktuara dhe të orientuara nga biznesmeni, Ermal Beqiri, është përfitimi i një përqindje të caktuar të vlerës së tenderit, duke patur parasysh që puna në të vërtetë do të kryhet nga vetë kompania në pronësi të tij, ‘Soft & Solution’…”
Sipas Shimës, një pjesë e mirë e procedurave të prokurimit në AKSHI janë “pilotuar” nga Beqiri përmes një rrjeti kompanish, ku disa subjekte futeshin në garë vetëm për të krijuar një proces formal dhe për të simuluar konkurrencën.
Ai ka përmendur konkretisht edhe rolin e kompanive të tjera në këto skema, duke ngritur dyshime se subjekte si “ICOM”, e lidhur me biznesmenin Alban Kokalari, janë futur në garë në mënyrë fiktive vetëm për të rritur numrin e pjesëmarrësve, ndërsa përfituesi real ishte i paracaktuar.
Po ashtu, Shima ka hedhur dyshime edhe mbi procedurën “AKCESK” të vitit 2024, duke deklaruar se përfituesi i vërtetë sipas tij ishte biznesmeni Beqiri dhe jo subjekti “First”, që administrohet nga Gëzim Hoxha.
Në dëshminë e tij, ish-zv/drejtori i AKSHI-t ka treguar se gjatë kohës që ushtronte detyrën, punësimet në këtë institucion janë kryer me emra të vendosur paraprakisht. Ai ka deklaruar se Beqiri i kishte propozuar Karçanajt punësimin e personave të njohur të tij, duke përmendur konkretisht Suela Ajo dhe Meri Manaj.
Sipas tij, edhe pse procedurat janë ndjekur formalisht, emrat kanë qenë të paracaktuar, me qëllim që këta persona të favorizonin interesat e kompanive të lidhura me Beqirin në procedurat e prokurimit.
Një tjetër element që del nga dëshmia është komunikimi i drejtpërdrejtë mes drejtuesve të AKSHI-t dhe biznesmenit. Shima ka treguar se Beqiri e takonte shpesh Karçanajn në zyrat e institucionit dhe se në disa raste i kishte bërë me dije paraprakisht se do të shpallej fitues në procedura të caktuara.
Sipas gazetarit Elton Qyno, ai ka përmendur konkretisht procedurën “Përmirësimi i sistemit E-Aktet”, ku sipas tij, Karçanaj kishte koordinuar me Beqirin që ai të shpallej fitues, ndërsa kompania “Fastech” e biznesmenit Andis Papa ishte futur në garë me ofertë më të lartë vetëm për të simuluar konkurrencën.
Në një tjetër rast, Shima ka deklaruar se edhe në procedurën për “Përmirësimin e sistemit të ASHK”, fituesi ishte paracaktuar dhe kontrata u përfitua nga Beqiri përmes kompanisë “Fastech”.
Po ashtu, ai ka përmendur edhe procedura të tjera si “Mirëmbajtja e depove farmaceutike” dhe “Implementimi i infrastrukturës së desktopëve virtualë për Autoritetin e Aviacionit Civil”, duke ngritur dyshime se kriteret janë vendosur për të skualifikuar ose favorizuar operatorë të caktuar.
Në këtë panoramë, Shima ka treguar se sipas eksperiencës së tij në AKSHI, kriteret teknike shpesh vendoseshin në mënyrë të tillë që të përjashtonin konkurentët e padëshiruar dhe të hapnin rrugën për subjektet e paracaktuara.
Ndërkohë, ai ka dëshmuar se gjatë një takimi me Karçanajn, kjo e fundit i kishte bërë me dije se Igli Tafa, në atë kohë drejtues i Autoritetit Kombëtar për Çertifikimin Elektronik dhe Sigurinë Kibernetike, ishte person i afërt me Beqirin, ndërsa edhe Edlira Gjolleshi rezultonte si lidhje e tij.
Referuar kësaj dëshmie, kujtohet se në muajin shkurt 2026, Igli Tafa u emërua nga kryeministri Edi Rama në krye të AKSHI-t, pas dorëheqjes së Karçanajt.
Në këtë kontekst, dëshmia e Daniel Shimës shihet si një nga elementët më të fortë të hetimit të SPAK për mënyrën e funksionimit të tenderave në AKSHI, duke implikuar një rrjet të gjerë lidhjesh mes zyrtarëve dhe biznesit.
Mbetet për t’u parë nëse këto deklarime do të çojnë në përgjegjësi konkrete penale për personat e përmendur, apo nëse kjo dosje do të mbetet në nivelin e dëshmive dhe dyshimeve mbi një nga çështjet më të ndjeshme të prokurimeve publike në sektorin e teknologjisë. /skyweb.al
