Aeroporti Ndërkombëtar i Rinasit ka njoftuar pasagjerët për vonesa dhe anulime të mundshme të fluturimeve për shkak të një greve të punonjësve të Kontrollit të Trafikut Ajror në Francë, të zhvilluar më 3 dhe 4 korrik 2025.
Në njoftimin zyrtar, TIA bën me dije se greva mund të ndikojë drejtpërdrejt në operimet e fluturimeve që kalojnë nëpër hapësirën ajrore franceze, duke sjellë ndryshime në oraret e parashikuara.
“Të nderuar pasagjerë të TIA-s, është njoftuar një grevë nga Kontrolli i Trafikut Ajror (ATC) në Francë për datat 3 dhe 4 Korrik 2025, e cila mund të ndikojë në operimet e fluturimeve dhe të shkaktojë vonesa apo anulime të mundshme. Për më shumë informacion, ju lutemi kontrolloni faqen zyrtare të linjës ajrore përkatëse dhe email-in/mesazhet tuaja SMS”, thuhet në komunikatën e shpërndarë nga Aeroporti i Rinasit.
Sipas autoriteteve franceze të aviacionit civil, gjatë grevës janë anuluar mbi 1.000 fluturime, duke përfshirë linja të rëndësishme në Evropë.
Pasagjerëve u rekomandohet të verifikojnë statusin e udhëtimit të tyre përpara nisjes dhe të jenë në kontakt me kompanitë ajrore për çdo ndryshim të mundshëm./skyweb.al
