Një tjetër aksion ndaj call center-ave në Tiranë ka përfunduar me sekuestrime dhe procedime, por jo me kapjen e drejtuesve kryesorë të skemës, duke rikthyer dyshimet për sabotim të hetimeve dhe mbrojtje të brendshme.
Operacioni i drejtuar nga Prokuroria e Tiranës, nën koordinimin e prokurores Rovena Zoto, në bashkëpunim me strukturat e krimeve kibernetike dhe ato ekonomiko-financiare, u zhvillua në disa zona të kryeqytetit.
Aksioni u përqendrua kryesisht në Rrugën e Kavajës, ku u zbuluan dy kate të një pallati të përshtatura si call center, si dhe një tjetër ambient pranë Kopshtit Zoologjik të Tiranës. Në këto ambiente operonin dhjetëra punonjës, të përfshirë në aktivitete të dyshuara mashtruese me shtrirje ndërkombëtare.
Gjatë kontrollit janë sekuestruar mbi 100 telefona celularë, të cilët dyshohet se përdoreshin për mashtrime ndaj qytetarëve jashtë vendit, duke gjeneruar shuma të mëdha parash.
Megjithatë, edhe këtë herë, në rrjetën e hetimeve kanë rënë vetëm operatorët, ndërsa organizatorët dhe drejtuesit kryesorë të këtyre call center-ave nuk janë arrestuar apo identifikuar publikisht.
Ky fakt ka ngritur dyshime të forta se aksione të tilla po sabotohen nga brenda, me përfshirje të mundshme të efektivëve të korruptuar që paralajmërojnë apo mbrojnë krerët e këtyre skemave.
Ndërkohë, përfshirja në hetim e shtetasve nga Gjermania dhe Austria tregon se çështja ka kaluar kufijtë e Shqipërisë dhe ka tërhequr vëmendjen e autoriteteve ndërkombëtare, të cilat po bashkëpunojnë për zbardhjen e plotë të rrjetit.
