Një zjarr i fuqishëm ka përfshirë një ditë më parë pallatin e njohur të ndërtuar nga kompania “Arlis”, duke shkaktuar panik te banorët dhe dëme të konsiderueshme materiale.
Sipas burimeve paraprake, flakët dyshohet se kanë nisur nga ambientet e Big Market që ndodhen në katet e para të ndërtesës.
Banorët u evakuuan menjëherë, ndërsa forcat zjarrfikëse ndërhynë për të vënë situatën nën kontroll. Fatmirësisht nuk raportohen viktima, por disa persona kanë marrë ndihmë mjekësore për shkak të asfiksisë nga tymi.
Autoritetet kanë nisur hetimet për të zbardhur shkaqet e zjarrit.
Si pjesë e këtyre hetimeve, është arrestuar menaxherja e marketit, e cila dyshohet për shkelje të rregullave të sigurisë kundër zjarrit.
Burime nga policia bëjnë me dije se në ambientet e biznesit mund të kenë munguar masat bazë mbrojtëse, çka mund të ketë ndikuar në përhapjen e flakëve.
Ndërkohë në kërkim është shpallur Armand Lilo administrator i kompanisë Arlis.
Ai kërkohet nga policia për të dhënë sqarime për ngjarjen.
Ndërkohë, ekspertët vijojnë verifikimet teknike për të përcaktuar shkakun e saktë të incidentit dhe përgjegjësitë ligjore.
Banorët e pallatit kërkojnë masa më të rrepta sigurie dhe kontrolle më të shpeshta për bizneset që operojnë në ambiente të përbashkëta banimi.
Ngjarja ka rikthyer në vëmendje rëndësinë e respektimit të standardeve të sigurisë, sidomos në ndërtesat ku bashkëjetojnë ambiente banimi dhe aktivitete tregtare. /infonews.al
