Erblin Bregu
Mes udhëtimeve ndërkombëtare të Edi Rama dhe protestës së Sali Berisha, diku aty u shfaq edhe fotoja e “lideres” së Liqenit të Thatë me një grup socialistësh 24 karat, që dukeshin të mërzitur e si të marrë me zor.
Një postim që mundohej të mbulonte diellin me shoshë, në fakt.
Pa hapur mirë sytë, pasi dje me të vetën tundi rrënjët e partisë, Elisa Spiropali sot postoi një foto me plot 8 veta, duke dhënë me pompozitet lajmin e madh se ajo po punon kudo dhe me të gjithë socialistët.
E vërteta qëndron ndryshe. As më pak e as më shumë, Elisa drejton punën e katër a pesë organizatave bazë, diku tek Liqeni i Thatë, një lagje e vogël e Tiranës, dhe postimi i sotëm ishte prodhim “artistik” i një mendjeje të munduar, që nuk po gjen qetësi me veten, sepse nga ç’duket të tjerët në Partinë Socialiste as nuk e kanë më në refene se çfarë bën ajo.
Elisa Spiropali, e dërrmuar pas ikjes nga qeveria dhe nga ëndrra në sirtar për të zëvendësuar Ramën, gjë të cilën e ka ndarë me shumë të huaj, që akoma nuk u ka dalë habia nga deliri i saj, ka ndërmarrë një inkursion imagjinar në radhët e socialistëve.
Ca e ndikuar nga ndonjë këshilltar apo media e përbetuar kundër Ramës, e ca nga karakteri që kurrë nuk e la të kuptonte dimensionin e saj të vërtetë, ka filluar të pretendojë se ka mbështetje tek socialistët dhe më gjerë.
Mjafton të kujtojmë fiaskot e Spiropalit në Ersekë, Pukë, Fushë-Arrëz e Kavajë, për të kuptuar vlerën e saj politike dhe elektorale.
Ndaj i duhen postimet me 8 veta dhe mbështetja mediatike e të mërziturve nga pushteti, pasi nuk mund të fshihesh gjatë pas rezultateve të Rakip Sulit e Benet Becit.
Për fatkeqësinë e Elisës, Doktorit apo ndonjë tjetër pretendenti për pushtet, socialistët kanë një zakon të keq: nuk e shesin partinë e Edi Rama as në ditët më të zeza.
Nuk e kanë shitur për Kastriot Islamin e Ben Blushin, që ishin pjella të partisë e politikanë me emër, jo më për “mishra të huaj importi” si Elisa Spiropali.
Megjithatë, duhet pranuar se, krahasimisht me vlerën e saj reale politike, ka bërë një marketim të mirë, duke bërë madje një pjesë të besojnë se ka nisur një lëvizje politike mes socialistëve, ndërkohë që kjo mbështetje nuk ekziston.
Deri në postimin e radhës të Elisës, duhet të merremi me ngushticën e Hormuzit, se na griu çmimi i naftës.
